नेपाली हास्यव्यङ्ग्य अनलाइन पत्रिका

जुम्राको काम या त टोक्नु या खर्खराउनु हो । एउटा परजीवी प्राणी हो जुम्रा । लिखो ब्लास्ट भएपछि भुसुनोेले प्रभुको कृपा पाएर मात्र केही दिन अरु बाँच्न पायो भनेदेखुन् जुम्रोको रूप धारण गर्छ । जुम्रो रक्तप्रेमी प्राणी हो । कपाल यसको प्रिय बासस्थान हो । केही दिन ननुहाइ बस्यो वा एउटै बस्त्र ज्यानमा टाँसी राख्यो भने जुम्रोले आफ्नो सङ्ख्यागत उपस्थितिलाई मजबुत बनाउँछ । यो धर्तीमा जुम्राको उत्पत्ती र विकास कसरी भयो भन्ने सम्बन्धमा प्रष्टिनको लागि ब्रह्माजीलाइ नै सोध्नुपर्छ, चाहे फोनबाट सोध्नुस् चाहे म्यासेन्जरबाट यो तपाइँको निजी कुरा भयो ।

जुम्राको उत्पत्तिको बारेमा केही बुझ्न एकदिन मैले ब्रह्माजीलाई फोन गरेर आफ्नो परिचय सहित सोध्दा उहाँबाट जवाफ आयो- बाबु ! तिमी निजी विद्यालयमा पढाउँदा रहेछौ । फोनमा त तिम्रो महिना दिनको तलव एकै मिनेटमा चट हुन्छ, तसर्थ यो फोन राख बरु म्यासेन्जरमा कल गर न । ओ हो ! हो त, हुन्छ प्रभु ! त्यसै गरी मैले म्यासेन्जरबाट जिज्ञासा प्रकट गरेँ । प्रभु ! जुम्रोले यो धर्तीमा कसरी प्रबेश पायो ? ब्रह्माजीले अलौकिक वाणि तर हाम्रै नेपाली भाषामा भन्नुभयो- “जुम्रो तिम्रै प्रतिरूप हो मनुवा ! यदि बिग्रियौ भने जुम्राले जति दुख दिन्छ नि तिमी बिग्रदा पनि यो समाजले त्यत्तिनै दुख पाउँछ ।

जुम्राको उत्पत्ती खासमा कहिले भयो भन्दा पनि मान्छेको मनमा जुम्रोले कहिले बास गर्‍यो, यो महत्वपूणर् कुरा हो । हिजोआज जुम्रोले प्राय नेताहरूको मनमा डेरा जमाएको छ । त्यसैले नेपाल आमाको टाउकोमा खर्खराउने यिनै नेतारूपी जुम्राहरू हुन् । यी नेताले जुम्रा अवतार धारण गरेकोले नै यो देशको अवस्था अस्थव्यस्त भएको छ । नेपाल आमाको अवस्था बिरूप हुन थालेको छ । थला परेकी नेपाल आमाका पढेलेखेका योग्य सन्तान धेरै पराइ मुलुकतर्फ लागेपछि जुम्राले नै राज गर्ने नै भए ।

अब जताततै जुम्राको हालीमुहाली हुने भयो । अनि यिनै जुम्राहरूको कारणले नेपाल देशको यो हविगत भएको हो । जुम्राहरू हाम्रो देश नेपालको अन्तरकुन्तर सबैतिर फैलिएका छन् । अर्को अर्थमा भन्नुपर्दा अहिले हाम्रो देश जुम्राको अधिनमा छ । जुम्राको निर्मूलीकरण नितान्त आवश्यक भैसक्यो । चेतना भया ।”

ब्रह्माजीको उक्त कथनले म त्यति अचम्मित भने भइन । किन कि म आफै जुम्राको भुक्तभोगी । लौ न प्रभो यो मुलुकलाई जुम्राको आक्रामक आतङ्कबाट छुटकारा दिने छैन कुनै उपाय ?

०००
२०७९/५/२५
भैरहवा