नगिता लेप्चा राईजमाना
दाज्यू बैनी सराबरी प्याण्ट लाउने जमाना आयो । अघिल्तिरबाट हेर्दा युवती पछिल्तिरबाट हेर्दा युवक देखिने फेसनले हामीलाई ग्रस्त पार्यो ।
युग बदलियो ।
सबै भन्छन् जमाना नयाँ आयो । बूढ़ापाका भन्छन्, पश्चिमी सभ्यताले हाम्रो संस्कार संस्कृति सखाप पार्यो । साँच्चै हाम्रो समाज आँखा चिम्लेर पश्चिमी सभ्यताको नकल गर्न सिपालु भएको छ । रहन-सहन, उठबस, लाउनु खानुमा पश्चिमी सभ्यताको जगजगी छ ।
सबभन्दा पश्चिमी फेसनले हाम्रा युवा-युवतीलाई लट्याएको छ । यो फेसन पनि परिवर्तनशील छ । एक जमानामा बिटल्स (त्जभ द्यभबतभिक)को जगजगी थियो । लामा लामा कपाल पालेर हातमा एउटा गिटार लिएर माथि डाँड़ामा बसी अलिकति झ्याङ्-झ्याङ पार्यो कि बिटल्स भइहाल्ने देसानले हाम्रा युवाहरूलाई भेटेकै हो एक समय । त्यसपछि मिनी स्कर्ट लाएर बजारबिचमा तिघ्रा देखाउने युवतीहरू जन्मिए । जमाना बदलिँदै गयो… टाइट फिटिङ लाउने युवतीहरूको जमात देखियो । भूइँमा अचानक केही खसे त्यो टिप्न घोप्टिँदा वा निहुरिँदा बजार बिचमा टाइट फिटिङ ह्वार्रै फाटेको दृश्य देख्नेहरू धेरै थिए । त्यतिबेला एउटा गीत निकै प्रचलित थियो-
रिटिङ रिटिङ नबजाऊ बिनायो
बिनायोले मन मेरो छिनायो ।
साइँला दाइ आय्या..या,
आकका सान नानी ।
टाइट फिटिङको बजार चम्केको बेला यसै गीतको प्यारोडीले बजार पिटेको थियो –
रिटिङ रिटङ नलगाऊ टाइट फिटिङ
टाइट फिटिङले मन मेरो लोभ्यायो
साइँला दाइ आय्या या…
आक्काका सान नानी ।
त्यसपछि जमाना आयो गुन्यूँ छोटो लाउने तर पेटिकोट (साया) लामो लाउने । हामीले गुन्यूँ छोटो र साया लामो लाएर आफूलाई सभ्य नारी देखाउने प्रयास गर्यौं । त्यतिबेला सायोनाराको गीत खूब प्रचलित थियो…
सायोनारा सायोनारा
वाधा निभाउँगी सायोनारा….
यसैको पेरोडी यसरी बनियो-
साया लामो गुन्यूँ छोटो
बैनीको ब्यागमा मेरो फोटो ।
दाज्यू बैनी सराबरी प्याण्ट लाउने जमाना आयो । अघिल्तिरबाट हेर्दा युवती पछिल्तिरबाट हेर्दा युवक देखिने फेसनले हामीलाई ग्रस्त पार्यो ।
उहिले हामीले फाटेको लुगाफाटा लाउनै नमान्ने । कतै फाटेको लुगा लाउनु परे हामी घरदेखि बाहिर निस्किन नमान्ने । जमाना बदलियो… अचेल जताततै फाटेको लुगा लाएर हिँड्ने भने असभ्य भनी मागिन्छ । नारी जातिको अङ्ग जति ढाक्न सकिन्छ उति सभ्य, संस्कारित ठानिन्थ्यो उहिले । अहिले च्यातिएको लुगा लाएर गोप्य अङ्ग प्रदर्शन गर्ने होड़बाजी पो चलेको देखिन्छ । भविष्यमा अब के के च्यातेर हिँड्ने हो त्यो जमानाले नै बताउला ।
भनिन्छ, जमानासित चल्नुपर्छ तर आफ्नो गोप्य अङ्गहरू प्रदर्शन गरेर हिँड्नु असभ्यता मात्र होइन कुसंस्कारको लक्षण हो ।
हाम्रो कति राम्रो पहिरन छ । चौबन्दी फरिया, साड़ी । भानुजयन्ती, फूलपाती शोभायात्रामा मात्रै एकदिन चौबन्दी फरिया पहिरियो अनि अरु दिन आफ्नो अङ्ग प्रदर्शन गर्दै फाटेको वा च्यातिएको लुगा पहिरिएर हिँड्नु अवश्यै पनि राम्रो लक्षण होइन ।
ठिकै हो । जमानासित हिँड्नुपर्छ । तर जमानासित हिँड्नु पायो भन्दैमा आफ्नो इज्जत, संस्कार संस्कृति मास्नु कुलक्षणकै सङ्केत हो भन्ने मलाई लाग्दछ ।
०००
खोलाचन्द फाप्री, जलपाइगुड़ी (भारत)
