नेपाली हास्यव्यङ्ग्य अनलाइन पत्रिका

पिँडालु पण्डित :

अक्कलमान अचेल अलिक असमञ्जस्य परिस्थितिमा गुज्रिरहेका देखिन्छन् । हिजोका दिनसम्म सबैलाई हप्कीदप्की लगाएर आफूले भनेअनुसार घर परिवार चलाएका मान्छे अहिले आएर अक्क न बक्कको स्थितिमा छन् । सामान्यभन्दा सामान्य कुरो पनि उनी एक्लै निर्णय गर्न हिच्किचाउँछन् । निर्णय गरेर फिर्ता लिनुभन्दा निर्णय गर्नुअघि नै छलफलमा लैजान उचित ठान्छन् र लैजान्छन् पनि ।

अक्कलमानका घरमा काम गर्न राखिएकी तर वर्ष पुगेकी रमिला समेत तेह्र जनाको परिवार छ । त्यसमध्ये पुरुषको सङ्ख्या तीन । बाँकी दश सदस्य महिला । दुई तिहाईभन्दा अझ बढी महिला । अक्कलमान र छोरो जेठाका दुई दुई श्रीमती, कान्छा छोराको एक श्रीमती, चार छोरी र एक काम गर्ने रमिला समेत दश जना महिलाका कारण अक्कलमानलाई अचेल अप्ठ्यारो स्थिति आइलागेको हो । ती सबै महिला एक आपसमा आफैँ दुई तीन गुट छन् तर पुरुषका विरुद्धमा उभिन पर्दा आफ्ना मनमुटाव सबै बिर्सेर एक हुन्छन् ।

अक्कलमानले तिनलाई फुटाउन कतिचोटि प्रयास गरे तर सबै प्रयास व्यर्थ सावित भए । फुटाएर राजनीति गर्ने अक्कलमानको अक्कल यतिखेर पूर्ण रूपमा असफल भइरहेछ ।

घरको वातावरण धुमिल भइसक्यो । घरका काम कारवाहीमा सल्लाह र मतैक्यता छैन । अक्कलमानले प्रस्ताव गरेका काम जतिसुकै राम्रा र हितकारी भए पनि महिलाको बहुमतले ती सबैलाई सरकारको उदाहरण दिएर पाखा लगाइदिन्छन् । विचरा ! अक्कलमान हेरेका हेर्यै ।

सधैंको यस हर्कतलाई चुनौती दिँदै अक्कलमानले मुख फोरे । सिंहदरबारको कुरा ल्याएर यहाँ लागू गर्न पाइन्छ ? सिंहदरबारका कुरा देखाएर घर परिवारका काम कुरामा भाँजो हाल्न पाइन्छ ?

छोराहरूले मुखले केही नबोले पनि बाबुकै कुरामा समर्थन जनाए । महिला सदस्यहरू भने अलिकति पनि टसमस भएनन् । अझ उनीहरू ठाडो डाँको गरेर भन्दै थिए- “सिंहदरबारको कुरा यहाँ लागू नभएर कहाँ हुन्छ त ? गाउँगाउँमा सिंहदरबार भन्ने सरकारको घोषणा सुन्नुभएको छैन ? छाड्दिनुस् । अब त दुई तिहाईका आडमा घरका सबै कुरामा हाम्रै कब्जा हुन्छ । जहाँ गएर जे उजुरबाजुर गर्नुपर्छ गर्नुस् । हाम्रो दुई तिहाईलाई चुनौती दिन अब परमेश्वरले पनि सक्तैनन् । बुझ्नु भो ?”

०००
काठमाडाैं