नेपाली हास्यव्यङ्ग्य अनलाइन पत्रिका

प्रकाश अर्याल :

देख्नमा धीर त्यो भित्र आघात छ
रश्मिको खोजमा शून्यता रात छ
लोकका सामुमा धाँधली चाल छ
आँसुका पोखरी दर्द आहाल छ ॥

लाभको तालमा जोखना हेरिने
शक्तिको आडमा फैसला फेरिने
ढोँगका बातका जाल जञ्जाल छ
फोहरी खेलका भिन्न सञ्जाल छ ॥

देशको हैन है व्यक्तिको स्वार्थ छ
सत्यको कल्पना गर्नु त्यो व्यर्थ छ
ज्ञानका टोकरी दूर बेहाल छ
झेलका बार्दली झाँक्न कोटाल छ ॥

शास्त्रको भावमा बज्रको तोड छ
धैर्यको बाँध त्यो भत्किने जोड छ
बाघको खालमा स्यालको जाल छ
भाँडिदो एकता तर्सिने छाल छ ॥

घोचको खेलले शान्ति जो रोक्दछ
पेचिलो शब्दले शत्रुता बोक्दछ
दृष्टिमा लोभको मोहको राल छ
हुस्सुका सोचका चाह बेताल छ ॥

०००
काठमाडौं