नेपाली हास्यव्यङ्ग्य अनलाइन पत्रिका

शोभा अधिकारी :

एक्लो छोरो । काठमाडौँमा घर । सरकारी जागिर ।राम्रो खानदान । परिवारका हरेक सदस्यले हुन्छ,भन्दै निर्णय गरे। मुनाले आफ्नो इच्छा आकांक्षा दबाएर दश वर्ष जेठो केटासँग विहे गरी ।

खरो र चर्को व्यवहार । खटनवाली सासु । रुखो ससुरा । उत्ताउली नन्द । शङ्कालु श्रीमानसँग घर गरी खान सकस भयो।

दिनरात मर्दै बाँच्दैको अनुभवमा बाबाआमाको इज्जतमा सम्झौता गर्दै बुहारीको भूमिका निर्वाह गरेर एम.ए पास गरी मुनाले ।

बुहारी बाँझी भई, अर्को बिहे गर बाबु भन्ने सासुलाई सुकुमार नाती जन्माइदिएर मुख बन्द गराइदिई, उसले। शिशुस्याहार केन्द्रमा बच्चा। जागिर । घरधन्दा । निर्दयी श्रीमानको व्यवहार । मुना थकित र निराश भइसकेकी थिए। मौन बस्दै सहँदा श्रीमानको व्यवहारले सीमा नाघ्यो।

छड्के जाँचमा सहर सुन्दरी सहित श्रीमानलाई रंगे हात भेटाइ , मुनाले।

धैर्यताको बाँध टुट्यो ।अन्त्यमा अदालतमा सबैको सामु बच्चा समाउँदै एकल महिलाको नाउँमा आफ्नो पहिचान सम्झौता गरेर आफूलाई आकाशमा रूपान्तरण गरी।

०००