एम्.सी.सी. नामको चारो
नैतिकता कतै छैन, हराएछ कता कता !! भ्रमको जाल देखिन्छ, बोलीपिच्छे जतातता । एउटै पार्टी हो भन्छ, अनेक थरी गुट छ, नियन्त्रण कतै छैन, जे बोले पनि छुट छ ।
एम्.सी.सी. नामको चारो छरेको छ अलिकति
जुधेका छन् सबै साँढे, गराई देशको खति ।
विदेशी बस्छ हाँसेर, रमिता मानी हेर्दछ,
आपसी एकता छैन, कसले किन टेर्दछ ?
नेता छन् दलका उच्च, सोचाइ तर नीच छ,
जनता ढाँट्नका लागि बोली दोधार बीच छ ।
नैतिकता कतै छैन, हराएछ कता कता !!
भ्रमको जाल देखिन्छ, बोलीपिच्छे जतातता ।
एउटै पार्टी हो भन्छ, अनेक थरी गुट छ,
नियन्त्रण कतै छैन, जे बोले पनि छुट छ ।
एउटा पूर्व फर्कन्छ, अर्को फर्कन्छ पश्चिम
विश्वास कसको गर्ने ? ओकल्छन् मत विभ्रम ।
जनता भ्रममा कुद्छन्, मेरै नेता सही भनी,
परस्पर भिडेका छन्, तिनैका गुडिया बनी ।
कीर्तिपुर