नेपाली हास्यव्यङ्ग्य अनलाइन पत्रिका

रोपेर मनमा घृणाको बेर्ना
कहाँ फुल्दो रहेछ र सुगन्धित फूल?
हिर्काएर अर्काको सिसमहलमा
कहाँ जोगिदो रहेछ र आफ्नो झुल ?
हजार कोसको यात्रामा
लाखौ जोडिन्छन्
हजार छोडिन्छन्
तर गन्तव्य नछोई कहाँ फर्किन्छु र म ?
सेतो वायूपंखी घोडा हुँ म !
थचक्क बस्न जानेको छैन
त्यसैले
अवरोधका घेरा तानेर
रोक्न नखोज
शान्त तलाउमा ढुङ्गा नहान
तिमीले भोगेका छैनौ होला
तलाउका ज्वारभाटाहरू
याद गर
पानीको एकथोपा
बलेको ज्वाला भन्दा कैयौंगुना बलवान् हुनेछ !
सुसाउँदै बग्ने नदी भन्दा
गड्की बग्ने खहरे भन्दा
शान्त तलाउ
हजारौंगुना वलशाली हुनेछ
तिमीलाई के थाहा
आगो भन्दा पानी
सयौंगुना शक्तिशाली हुन्छ ।
त्यसैले
शान्त तलाउमा
ढुङ्गा नहान
किन कि
म शान्त नारी हुँ
शान्त तलाउ हुँ ।

०००