नेपाली हास्यव्यङ्ग्य अनलाइन पत्रिका

कृष्णप्रसाद दाहाल :

(१)
हिमाली यो सुन्दर ड्याङमा कति धेरै मूला
जता हेर्यो त्यतै देख्छु ठूला ठूला मूला ।
दायाँ बायाँ वरपर सबैतिर मूला
जो जो जता भए पनि सबै ठूलै ठूला ।

(२)
तलदेखि माथिसम्मै रङ रङका मूला
लेकबेँशी पहाड तराई जात जातका मूला ।
काला राता डल्ले थेप्चे राम्रा राम्रा मूला
जो जो जस्ता भए पनि सबै ठूलै ठूला ।

(३)
मलखाद जति भा नि नअघाउने मूला
जे खाए नि भुँडी फुल्ने कति ज्याद्रा मूला ।
यति, ओम्नी, धमिजा र लाउडा निल्ने मूला
होली वाइन, झोलुङ्गे पुल पचाउने मूला ।

(४)
कोही राता कोही सेता कोही डल्ला मूला
कोही चेप्टा कोही कुख्रे, कोही ढुक्ने मूला ।
पुराना क्वै कोही चाहिँ नयाँ खालका मूला
जो जो जस्ता भए पनि सबै ठूला मूला ।

(५)
कोही दायाँतिर हिँड्ने, कोही बायाँ मूला
कुनै उत्तर जान्छु भन्छ, कोही दक्षिण मूला ।
सधैं यस्तै बस्छु भन्छ, फेरि कुनै मूला
जो जो जता गए पनि एकै ड्याङका मूला ।

(६)
साना साना सातै ड्याङका कति ठूला मूला
सिंहदरवारभित्र फले झनै ठूला मूला ।
गाउँ गाउँमा ठूला मूला देशैभरि मूला
डाँडापाखा कुना काप्चा रङ् विरङका मूला ।

(७)
सानालाई शासन गर्ने पनि ठूला मूला
ठूलालाई घुमाउने अझ ठूला मूला ।
जति जति ठूला हुन्छन् गनाउने मूला
आफैं मरिच चाउरिए झैं चाउरिने ती मूला ।

०००
श्री सिद्धेश्वर मा. वि., दावाँ, भोजपुर