नेपाली हास्यव्यङ्ग्य अनलाइन पत्रिका

हेमराज अधिकारी :

शिरमा मणिझैँ शोभा जस्तै त्यो हिमको छवि
झोलेका काँधमा झोला सुहाउँदछ बेसरी ।

झोला मैले भिरेको छु भन्छन् झोले भनून् तर
प्रतिष्ठा पदको भारी बोकेकै छु निरन्तर ।

क्रान्ति वा शान्तिका गीत आगो वा पानीका कुरा
झोला हो शक्तिको पुञ्ज घुम्छ घुमाऊँदै छुरा ।

सरुवा बढुवादेखि सारा राज्य प्रशासन
झोलाबाटै चलेका छन् म झोले नबनौँ किन ?

सौभाग्यले कृपादृष्टि पर्‍यो मालिकको यदि
लेख्नै पर्दैन त्यो पक्का हुन्छ स्रष्टा महान् कवि ॥

झुप्पा अँगुरका जस्ता बोकेर सपनाहरू
झोलाबाट निकालेर बाँडेका छन् खुरुखुरु ।

झोलाभित्रै पुरस्कार झोलामै धन दौलत
सिङ्गै पार्टी छ झोलामा सिङ्गै देश अटाउँछ ॥

अग्ला यी हिमका चुच्चा पग्लिँदै तल झर्दछन्‌
मात्रै झोले बनौँ आफैँ खजाना टन्न भर्दछन् ।

स्वतस्फूर्त केही छैन बाँकी चिन्तन मन्थन
योग्यता भन्नु झोला हो अनि म नभिरुँ किन ?

झोलाबाटै बनेका छन् प्रा.डा.प्राज्ञ भने किन ?
अग्रगामी बनी आजै झोले म नबनौँ किन ?

झोला संस्कृति हो हाम्रो झोला जीवन दर्शन
झोलाकै कविता लेखी झोले म नबनौँ किन ?

०००
अर्जुनधारा, झापा