नेपाली हास्यव्यङ्ग्य अनलाइन पत्रिका

काठमाडौँ, २०८१ माघ १२ । वरिष्ठ समालोचक, उपन्यासकार, नियात्राकार तथा निबन्धकार प्रा.डा. गोविन्दराज भट्टराईको नयाँ उपन्यास ‘नयाँ मुग्लान’को लोकार्पण भएको छ । प्राध्यापक एवम् कवि एल बी क्षेत्रीको अध्यक्षतामा प्रा.डा. अभि सुवेदीको प्रमुख आतिथ्यमा नेपाल प्रज्ञा प्रतिष्ठान परिसरमा आयोजित कृतिको लोकार्पण भएको हो । कार्यक्रमको उद्घोषण प्राध्यापक अशोक थापाले गरेका थिए ।

कार्यक्रममा आख्यानकार जानुका खतिवडाले कृतिमाथि पाठकीय प्रतिक्रिया राखेकी थिइन् । उत्तर आधुनिकतालाई प्रयोग गरिएको सिंगो उपन्यासले विमानविकृत भइरहेको हाम्रो देशको वास्तविक चित्रण गरेको उनले बताइन् । उपन्यासलाई उनले ‘कर्मी चराको गुँड जस्तो’ संज्ञा दिएकी थिइन् । उपन्यासमा आफूले विधा मिश्रण पाएको उनको भनाइ थियो ।

विशिष्ट अतिथि प्रा.डा. कुमार कोइरालाले उपन्यासलाई अनिश्चयको चिन्तनबाट लेखिएको बताए । उपन्यासकारको शारीरिक पीडा र देशको पीडा दुबैले उपन्यास लेख्न उक्साएको पनि उनले भने । उपन्यासमा स्वैरकल्पना र बिडम्बनापूर्ण हास्यरस मिसिएको पनि उनले बताए ।

व्यगात्मक रुपमा प्रस्तु गरिएको उपन्यास उत्तरआधुनिक काव्यिक शैली रहेको आफूले पाएको कोइरालाको भनाइ थियो । नयाँ मुग्लान नेपालको वर्तमान अवस्थाको पुनःलेखन भएको भन्दै यसलाई उनले किनारीकृतहरूको दुखान्त कथा भने । उपन्यास भ्रान्तिको सिद्धान्तमा लेखिएको उनको भनाइ थियो ।

कार्यक्रममा साहित्यकार तथा प्रा महेश पौड्यालले निर्वासन चिन्तनको आधारमा उपन्यासमाथि चर्चा परिचर्चा गरेका थिए । कुनै समय मुग्लान भासिएकाहरूको मृत्युको खबर रातो धागो बाँधिएको चिठ्ठीमा आइपुग्थे । तर अहिले कफिनमा शव आउने गरेको कटु सत्यतालाई उपन्यासले प्रकाश पारेको उनको भनाई थियो । साहित्यका विविध विधामा साधनारत् भइरहँदा आफूले उपन्यास लेख्न नसकेको चिन्तापीडा यो उपन्यासमा पोखेको डा. गोविन्दराज भट्टराईले भने । लेख्न नपाएको कुन्ठा उम्लिएर यस कृतिमा पोखिएको उनको भनाई थियो ।

कार्यक्रममा अभि सुवेदीले ‘नयाँ मुग्लान’लाई अधिचेतनाले लेखिएको उपन्यास बताए । कृति उत्तर आधुनिकतामा आधारित भएर देखिएको भन्ने अन्य वक्ताको भनाईलाई काट्दै सुवेदीले यो शक्तिशाली उपन्यास भएको बताएका थिए ।

कार्यक्रमको अन्त्यमा एल बी क्षेत्रीले आफू र आफ्नो परिवार स्वयम् मुगलानिएको भन्दै कृतिमा धारणा राख्नु कत्तिको जायज होला भन्ने प्रश्न गरेका थिए । गाउँहरू रित्तै भइरहेकोमा उनले चिन्ता पनि व्यक्त गरेका थिए । पेज टर्नरले प्रकाशन गरेको यो कृतिको मूल्य ३७५ रुपैयाँ रहेको छ ।

डा. भट्टराईकाे नयाँ मुगलान कृति लाेकार्पणकाे पुरा कार्यक्रम फित्काैलीकाे आधिकारिक युटुव च्यानल fitkauli ko khitkauli, fitkauli.com र फित्काैलीकाे फेसबुक पेजबाट लाइभ प्रशारण गरिएकाे थियाे ।

०००
समाचार श्राेत : राताेपाटी डटकम, तस्विर : फित्काैली