नेपाली हास्यव्यङ्ग्य अनलाइन पत्रिका

अस्ट्रेलिया, २०८२ असार ८ । फित्काैली डटकमका नियिमत कार्टुन कलाकार राजेश मानन्धरकाे एकदिने एकल चित्रकला प्रदर्शनी सिड्नीमा सम्पन्न भयाे ।

नेपाल कला साहित्य तथा संस्कृति प्रतिष्ठान (NKSSP) द्वारा आयोजित २१२ औं भानु जयन्ती उत्सवको रूपमा सम्पन्न विविध सांस्कृतिक तथा साहित्यिक कार्यक्रममा मानन्धरकाे चित्रककला प्रदर्शनी समेत समावेश गरिएकाे थियाे ।

कार्यक्रम परिसरमा मानन्धरका अस्ट्रेलिया यात्रा यात्राकै क्रममा सिर्जना गरिएका जलरङका चित्रहरू डिस्प्ले गरिएकाे थियाे । यस  प्रदर्शनीमा अस्ट्रेलियन कला पारखीहरूका साथै डायस्पाेरा नेपाली समुदायले अत्यन्त रूचिका साथ प्रदर्शित चित्रहरूकाे अवलाेकन गरेका थिए ।

नेपाल कला साहित्य तथा संस्कृति प्रतिष्ठान (NKSSP) मा सम्बद्ध प्रा. डा. राजु मानन्धर र श्री रामहरि आचार्यले याे प्रदर्शनीका लागि आवश्यक पहल एवम् आयाेजनामा सहजीकरण गर्नु भएकाे थियाे ।

प्रदर्शनीकाे क्रममा स्थानीय पत्रकारहरूकाे जिज्ञासामा कलाकार मानन्धरले भन्नु भयाे ‘सिड्नीमा आयोजित मेरो याे एकल जलरंग चित्रकला प्रदर्शनी कलाकारको रूपमा मेरो पूर्ण र भावनात्मक कोसेढुङ्गा थियो। प्रदर्शनीले नेपाल र अष्ट्रेलियामा सिर्जना गरिएका मेरा जलरंगका चित्रहरू मात्र प्रदर्शन गरेकाे छैन, पहिचान, संस्कृति, परिदृश्य र मानव सम्बन्धका कथाहरू प्रतिबिम्बित गरेकाे अनुभव गर्दैछु।’

मानन्धरकाे कथन थियाे ‘सिड्नीमा रहेका नेपाली समुदायबाट न्यानो उपस्थिति र हार्दिक प्रोत्साहनले मलाई अत्यन्त उत्साहित गरेकाे छ, नेपाली कला र संस्कृतिमा मेरो निरन्तर योगदानलाई मान्यता प्नदान गरेकाे छ, NKSSP द्वारा प्रेमको प्रतीकले सम्मानित हुन पाउँदा म प्रफुल्ल र राेमाञ्चित भएकाे छु ।’

’केही समयकाे लागि पाहुनाकाे रूपमा अस्ट्रेलिया आएकाे कलाकारलाइ यस्ताे अविस्मरणीय अवसर जुटाइिदने  प्रा.डा. राजु मानन्धर र श्री रामहरि आचार्यप्रति हार्दिक म आभार व्यक्त गर्दछु।‘ राजेशले भन्नु भयाे ।

अष्ट्रेलियाको अग्रणी संस्था नेपाल कला साहित्य तथा संस्कृति प्रतिष्ठानले नेपालको कलालाई समृद्ध र स्तरोन्नति गर्न गरेको अविश्वसनीय योगदानको लागि मानन्धरलाइ प्रेमको प्रतीक प्रदान गरेको छ । याे एकल प्रदर्शनी मार्फत नेपाल र अष्ट्रेलियाका विभिन्न स्थानहरूमा सिर्जना गरिएका आफ्ना उल्लेखनीय पानी चित्रहरू  प्रदर्शन गरिएकाे थियाे ।

प्रख्यात गायक तथा कवि लेखकहरू सुजाता केसी बस्नेत, ज्ञानुवाकर पाैडेलहरूलगायत धेरै नेपाली बन्धुहरू समेतकाे अविश्वसनीय भेट उल्लेखनीय रूपमा ताजा, प्रेरणादायी र फलदायी बनेकाे आयाेजकहरूले बताएका छन् ।

राजेश मानन्धरले विगत ३६ वर्षदेखि नेपालका विभिन्न राष्ट्रिय दैनिक, साप्ताहिक र मासिक पत्रपत्रिका र अन्य पत्रिकाहरूमा कार्टुनिस्टको रूपमा निरन्तर योगदान गर्दै आउनु भएकाे छ । प्रकाशित कार्टुन संग्रह, शैक्षिक चित्रण र जागरूकता अभियानका लागि रचनात्मक सामग्रीहरू समावेश छन्। कला केवल आत्म-अभिव्यक्तिको माध्यम मात्र होइन भन्ने मानन्धर यो त कथा कथन, शिक्षा र सामुदायिक सम्बन्धको लागि एक शक्तिशाली उपकरण पनि हो भन्नुहुन्छ ।

कलाकारको रूपमा उहाँकाे यात्राले नेपाल, भारत, कोरिया, जापान, चीन, इन्डोनेसिया, बंगलादेश, अष्ट्रेलिया र धेरै युरोपेली देशहरूमा एकल र सामूहिक प्रदर्शनीहरू सहित सीमा पार गरेको छ। यी अवसरहरूले उहाँलाई विश्वभरका दर्शक र पाठकहरूसँग नेपालको सुन्दरता र सांस्कृतिक गहिराइ साझा गर्न अनुमति दिएको छ।

गत तीन महिनादेखि अस्ट्रेलिया पुग्नु भएका राजेश अस्ट्रेलियाबाटै फित्काैलीका लागि दैनिक रूपमा कार्टुन बनाइरहनु भएकाे छ ।
फित्काैलीमा मूलत: हास्यव्यङ्ग्यात्मक साहित्यिक रचनाहरू मात्र प्रविष्ट गर्ने गरिएकाे छ । यद्यपि देशकाे दैनन्दिनका विसङ्गत घटनाहरूलाइ टिपेर कार्टुन मार्फत राजेशले व्यङ्ग्य प्रक्षेपण गर्दै आउनु भएकाे छ ।

०००

हेराैँ प्रदर्शनीमा राखिएका केही चित्रहरू