नेपाली हास्यव्यङ्ग्य अनलाइन पत्रिका

ओखलढुङ्गा, २०८२ मङ्सिर १६ । माेलुङ प्राप्चास्थित शिवदूती माविकाे आयाेजनामा एक साहित्यिक कार्यक्रम सम्पन्न भयाे ।

विद्यालयकाे प्राङ्गणमा भएकाे उक्त कार्यक्रम विद्यालयका प्रअ रामकुमार ढकालकाे सभापतित्वमा भएकाे हाे । कार्यक्रमका प्रमुख अतिथि फित्काैली डट कमका प्रधान सम्पादक तथा हास्यव्यङ्ग्यकार नरनाथ लुइँटेल, विशिष्ट अतिथिहरूमा डा. बमबहादुर थापा जिताली, बृहत्तर महाकाव्यकार चन्द्रप्रसाद न्याैपाने, डिल्लीप्रसाद मूलतिहुन, कुलप्रसाद दाहाल, रमेश गाउँलेलगायत रहेका थिए ।

कार्यक्रमलाई विद्यालयका प्रतिभावान छात्राछात्रहरूका कवितावाचनले आकर्षित बनाएकाे थियाे । नेपाली लाेकछन्द मझाैला झ्याउरे (असारे), सवाई लय शैली संरचनामा रचित कविताहरूले वर्तमान देशकाे स्थितिदेखि प्रकृति, संस्कृति, राजनीतिलगायत विविध विषयकाे प्रतिनिधित्व गरेका थिए ।

सहभागी विद्यार्थी कविहरूमा विपना फुयाँल, सुमित्रा फुयाँल, निशिका फुयाँल, अस्मिता फुयाँल, प्रवेश कटुवाल, इभाना दाहाल, आयुष पाेखरेल, अप्सरा दाहाललगायतका थिए ।

प्राैढकविहरूमा डिल्लीप्रसाद मूलतिहुनकाे मन्दाक्रान्ता छन्दमा विरचित जन्मस्थलप्रति समर्पित कविताले सभालाई हाैसाएकाे थियाे । अतिथिकविहरूमा कुलप्रसाद दाहाल, रमेशकुमार दाहाल, खिला धमला, गाेपालप्रसाद दाहाल, डा. बमबहादुर थापा जितालीलगायतले कविता वाचन गरेका थिए ।

कार्यक्रममा मणिराम दाहाल, बालकृष्ण दाहालले शुभकामना व्यक्त गरेका थिए भने बृहत्तर महाकाव्यकार चन्द्रप्रसाद न्याैपानेले ओखलढुङ्गाका कवि लाेकहरि बराल (१९३४-१९९७) देखि हालसम्मका कविहरूकाे इतिहास र कार्यक्रममा वाचित सहभागी कविताहरूकाे समीक्षात्मक टिप्पणी गरेका थिए ।

कार्यक्रममा प्रमुख अतिथि नरनाथ लुइँटेलले यस्ता कार्यक्रमले नयाँ पुस्तालाई हाैसला दिनुका साथै नेपाली साहित्यकाे संरक्षण, विकास भइरहने कुरा बताउनुभएको थियाे । उहाँले कार्यक्रममा सहभागी शिवदूती मा.वि., जीवनप्रदीप मा.वि र कालिका माविका  विद्यार्थीहरूलाई फित्काैली प्रकाशनका हास्यव्यङ्ग्य कृतिहरू, डा. बमबहादुर थापा जितालीकाे जहाँ छन् बुद्धका आँखालगायत साहित्यिक कृतिहरू पुरस्कारस्वरूप प्रदान गरिएको थियाे ।

राजधानी काठमाडाैंबाटै प्रविधिमार्फत फुइँडाक्टर नवराज खतिवडाद्वारा संक्षिप्त शुभकामना मन्तव्य दिइएकाे उक्त कार्यक्रमकाे सञ्चालन साेही विद्यालयका कविशिक्षक गाेपालप्रसाद दाहालले गरेका थिए । कार्यक्रममा  तीन वटै विद्यालयका छात्रछात्रा, शिक्षक शिक्षिका,  र स्थानीय अभिभावकहरूकाे उल्लेखनीय सहभागिता रहेकाे थियाे ।

०००
चन्द्रप्रसाद न्याैपानेकाे साैजन्यमा