नेपाली हास्यव्यङ्ग्य अनलाइन पत्रिका

सरला पोख्रेल सरु :

मातापिता गुरु सबै अति पूजनीय
सर्वत्र हुन् भुवनका अति वर्णनीय।
शिक्षा दिएर नव-मार्ग बनेर घाम
यी ज्येष्ठ नागरिकमा छ सदा प्रणाम II१

भोगेर दुःख-सुख यो वय पार गर्दै
हाम्रै निमित्त सुखका सब बीज छर्दै।
लाग्छन् सदैव घरका अति तीर्थ धाम
यी ज्येष्ठ नागरिकमा छ सदा प्रणाम।I२

हाम्रो कला र इतिहास बचाउने ती
संस्कारका अमृत-विन्दु सिकाउने ती।
छाया दिने तरुसरी अति दिव्य नाम
यी ज्येष्ठ नागरिकमा छ सदा प्रणाम II३

सद्भाव, ज्ञान र विवेक प्रवाह गर्ने
हाम्रो उजाड दिलमा रस-रङ्ग भर्ने।
खुल्छन् रमेर हँसिला दृग छन् समान
यी ज्येष्ठ नागरिकमा छ सदा प्रणाम ।।४

त्यागेर स्वार्थ सुख-शैल सजाउने ती
आफ्नो भलो भुवनमा पर सार्न जाती I
यी पूज्य हुन् हृदयका महनीय नाम
यी ज्येष्ठ नागरिकमा छ सदा प्रणाम।I५

०००