नेपाली हास्यव्यङ्ग्य अनलाइन पत्रिका

डा. हरिकुमार श्रेष्ठ ‘शिखर’ :

हिमाली मुस्कानसँगै,
सदियौँदेखि भिरालो छात्तीमा
साहसको
काँडादार सुरक्षा कवचमा,
राता–पहेँला फूल, फलका
गहनाले सजिएर
ठिङ उभिन्छौ
धरती ब्युँझाउने चुत्रो ।

सानो र साहसी छौ,
त्यसैले सहन सक्छौ
चिसो हावाको जोरदार थप्पड,
हिउँको प्रलयकारी भारी ।

तिमी चम्कन्छौ
सुनौलो डाँठ र जराले,
अनि बीउ र पातले
बरबरिन तत्त्व घोलेर
मानवीय प्राणको उज्यालोको लागि
सुन्दर फलको
गुलियो–अमिलो रसदार स्वादमा
मानव र पशुपन्छी जगाउँछौ ।

एण्टिब्याक्टेरियल र एन्टिइन्फ्लेमेटरी गुणले भरिपूर्ण,
तिमी यो देशको
अमूल्य रत्न र निधि हौ ।
परम्परागत आयुर्वेदमा
आँखा, पाचन, छाला र मधुमेय रोग
निको पार्ने विधि हौ ।

फुल्छन् कति पशुपन्छी
तिम्रै काखमा,
झुल्छन् कति केटाकेटी
तिम्रो स्वादमा ।

चुत्रो,
तिमी वनको बोट मात्र हौइनौँ,
तिमी त जीवन जगाउने बुटी हौ ।
आफ्नै रस, बास्ना र स्वादमा
रम्नसक्ने धुकधुकी हौ ।

तर हिजोआज,
तिम्रो वासस्थान र अस्तित्व
नामेट पार्न कस्सिएका छन्,
केही कसाई र रावणहरू
कसैको इसारामा ।

तिम्रा सुरक्षा कवच तोडी,
तिम्रा शिरदेखि पाउसम्म छेदन गर्दै,
तिम्रो यस धरतीमा टेक्ने पाइला मेटाउँदै।
यो धरतीमा बगाइरहेका छन्
तिम्रा रगत र आँसु ।

तर अँध्यारो कोठामा किन मौन छन्
यो देशका न्याय र कानुनका ठेलीहरू ?

०००
नागार्जुन–१०, काठमाडौँ