नेपाली हास्यव्यङ्ग्य अनलाइन पत्रिका

शालिग्राम अर्याल :

सीमाना देशको चोर्‍यो ! खगौतो – वेद चोरी भो !
लाउडा धमिजा चोर्‍यो, चियाबारी नि चोरी गो !
ललिता निवासनै चोर्‍यो, सुन चोरेर के गर्‍यो ? ।
कोहोरो तगडा ल्याई जगाइ पक्रनुपर्‍यो ।।१।।

युवा नेपालीनै चोर्‍यो ! चोरी उद्योगनै सफा !
जग्गा कैलालीको चोर्‍यो ! चोर्‍यो कानुनका दफा ।
चोर्‍यो स्काउटको जग्गा ! सरकारले के गर्‍यो ?
कोहोरो तगडा ल्याई जगाइ पक्रनुपर्‍यो ! ।।२।।

कोशी-गण्डकीनै चोर्‍यो ! महाकाली नि चोरी भो !।
नमिता-सुनिता चोर्‍यो ! निर्मला पनि चोरी गो ।
धर्म-संस्कारनै चोर्‍यो ! चोर्‍यो बौद्धिकको जरो !
कोहोरो तगडा ल्याई जगाइ पक्रनुपर्‍यो !।।३।।

हिसाबै कतिको चोर्‍यो ! निसापै चोरियो कति ? ।
अड्डा-अदालतै चोर्‍यो ! के खप्ने अब भो अति ।
खोज्ला सरकारले भन्दा चोरको मीत झैं गर्‍यो !
कोहोरो तगडा ल्याई जगाइ पक्रनुपर्‍यो ।।४।।

चोर पत्ता लगाउनै सरकारले सकेन छी;!
या चाहेन कि आफैं पो सहभागी भएछ कि !
बन्दै विदेशको दास, कि सरकार कतै सर्‍यो ? ।
कोहोरो तगडा ल्याइ जगाइ पक्रनुपर्‍यो ! ।।५।।

०००
सिद्धलेक- १, बैरेनी धादिङ