नेपाली हास्यव्यङ्ग्य अनलाइन पत्रिका

शालिग्राम अर्याल :

यौटै थ्यौ पहिले फुटेर अहिले भा’छौ चिराका चिरा
के थ्यो स्वार्थ ? भएन क्यै तर भलो ! आफैं घट्यौ आखिर
पार्टी दर्जन भो र पो मत फुट्यो ! के भो त खै फाइदा ?
पाए स्वाद विपक्षले ! तर तिमी बाझ्ने र हार्ने सदा ! ।१।

मौका मिल्न पुगे छिमेक जहिल्यै खेल्छन् तिमी भित्र नै
धारेहात लगाउँदैछ जनता ! गुम्दै गए मित्र नै
ऐले बुद्धि पस्यो र मिल्न कसिए ! भन्दै भयाैं हर्षित
तिम्रा ती पद-भाग मिल्न नसकी पार्दै गयौ त्रासित ।२।

पार्टी मेल हुने भन्यौ, रहरले हाल्यौं सबैले मत
के भो लौ परिणाम ? याद गर ! के तिम्रै थियो किस्मत ?
ऐले मिल्न सके भविष्य बनिने ! कम्निष्टको राज भो
फुट्यो जीवन गो ! कलंकित भयौ तिम्रो नि बेहाल भो ।३।

अर्काको परिबन्ध-खेल-छलको ख्यालै नगर्ने भए !
के नेता बनियौ त ? स्वार्थ लिनमै सर्वस्व देने भए !
बाँढेथ्यौ नि त साम्यवाद सपना ! ऐल्यै भयौ घातकी
कालो त्यो इतिहास बन्छ अब ता ! बन्छौ महा-पातकी ।४।

०००
धादिङ
पुरानाे पाेकाे (२०८१)