नेपाली हास्यव्यङ्ग्य अनलाइन पत्रिका

शालिग्राम अर्याल :

यो ब्रह्माण्ड र विश्वको बिषयमा पढ्दै नपढ्ने भएँ ।
आफ्नो देश त भ्रष्टले निलिसके लढ्दै नलढ्ने भएँ ।।
जागा हौ, उठ ! भन्दछन् विदुषले उठ्दै नउठ्ने भएँ ।
जुट्नैपर्छ जुटौं, युवा भनिरहे जुट्दै नजुट्ने भएँ ।।१।।

शास्त्राध्यायन गर्न-जान्न मनले मान्दै नमान्ने भएँ ।
बृद्धा-बालकको दया र ममता जान्दै नजान्ने भएँ ।।
सेवा भाव समाजको अझ कतै राख्दै नराख्ने भएँ ।
बेस्या-मादक-तासमा मन गयो थाक्दै नथाक्ने भएँ ।।२।।

आस्था-भक्ति लिएर नाम हरिको पुज्दै नपुज्ने भएँ ।
ज्ञानी बन्न सुझाउँछन् सबजना सुझ्दै नसुझ्ने भएँ ।।
उठ्छन् रीस रिसाउँदै हरघडी हाँस्दै नहाँस्ने भएँ ।
बाको अर्ति छ गाँस दिब्य पिरती ! गाँस्दै नगाँस्ने भएँ ।।३।।

ज्यादै रम्दछु जाँड-भाङसँग हे छोड्दै नछोड्ने भएँ ।
भ्याएँ पैतृक दौलतादि अहिले जोड्दै नजोड्ने भएँ ।।
छोडें धर्म र संस्कृती अतितका हेर्दै नहेर्ने भएँ ।
बा-आमा-गुरुका भनाइ रसिला टेर्दै नटेर्ने भएँ ।।४।।

भाषा-भेष र छन्द ज्ञान कहिल्यै सिक्दै नसिक्ने भएँ ।
आफ्नै अक्किल बुद्धिले सुरचना झिक्दै नझिक्ने भएँ ।
आफ्नै पौरखले कमाइ गतिलो खाँदै नखाने भएँ ।
गाडी छैन भने छिमेक घरमा जाँदै नजाने भएँ ।।५।।

सानो दु:ख गरेर आर्जन गरौं भन्दा त डर्ने भएँ ।
सिल्ली काँतरभै पराधिन हुँदै साँच्चै म मर्ने भएँ ।।
नेता चुन्न त दाम-जांँड नभए चुन्दै नचुन्ने भएँ ।
सत्यासत्य विवेक ब्रह्मदिलले गुन्दै नगुन्ने भएँ ।।६।।

०००
नलाङ, धादिङ