नेपाली हास्यव्यङ्ग्य अनलाइन पत्रिका

रात्रीबसमा खाँदी खाँदी ल्याउँछ
खसीबोका झैं
गाउँ गाउँबाट युवाहरू
अनि छाडिदिन्छ
यो आरसिसि जंगलमा,
चर्ने क्रममा खसीबोका जुधेझैं
तिनै युवाहरू जुधेको रमिता हेर्छ
जिब्रो पड्काइ पड्काइ
धरहराको टुप्पोबाट
नपुङशक काठमाडौं ।

रत्नपार्कका तीखा स्तनका
चिसा दरिद्र सुस्केराहरू
सुन्दासुन्दा आजीत
एकथान टुँडिखेल
हरेक विकृत स्खलन
उत्तानो परेर सहिरहन्छ,
र पनि चुपचाप रमिते छ
नपुङशक काठमाडौं ।

कुर्सीका मूर्धन्य महायोद्धाहरू
कुनै चटकेको चमत्कारझैं
रातारात
चप्पलबाट प्राडोमा पुग्दासमेत
थपडी पिटेर खुल्लामञ्च मार्फत
अनुमोदन गरिरहेकै छ
नपुङ्शक काठमाडौं ।

सबै प्रजातन्त्र र तानातानको
सबै गणतन्त्र र हानाहानको
भण्डारखाल पर्व बिचमा
निसासिएका
पेटमा पटुकी कसेका
श्रमिकहरू हूल बाँधेर
मरूभूमितिर उड्दा समेत
समयको घडीभित्र
घण्टाघरको अक्करमा झुण्डिएर
प्रत्यक घण्टा
मृत्युको सूचना दिइरहन्छ
नपुङ्शक काठमाडौं ।

हो,
यो नपुङ्शक काठमाडौं ।

जोरपाटी, काठमाडौं