नेपाली हास्यव्यङ्ग्य अनलाइन पत्रिका

धन्य कली धन्य कली के के देख्नु पर्ने
साँचो कुरा लुकाएर झूटो लेख्नु पर्ने ।
लोग्ने छली उत्ताउलीले नाठो भेट्नु पर्ने
झूटो बोली लोग्ने चाहिँले जाँड धोक्नु पर्ने ।

कलेज जाने केटाकेटी ठीक छैन चाला
मौका परे बाटामा नै चाटी हिँड्छन् गाला ।
मन्दिरको दशा हेर पुजारी भयो पापी
नानाभाँती के के खान्छ भक्तजन ढाँटी ।

आज भोलि जताततै नक्कलीको राज
केटीको त कुरै छाडौँ बुढीलाई छैन लाज ।
पुरुष पनि कम छैनन् बाहिर ठीक्क पार्ने
घरमा स्वास्नी भए पनि अर्काकी नै ताक्ने ।

बजार गयो जताततै मिलावटको खेल
कालाबजार गर्नेलाई कहिले हुल्ने जेल ?
युवा जति विदेश गए देश भयो खाली
नेता जति ठग भए कुरा भयो बासी ।

नेपालको सान हेर कति ठूलो थियो ?
नेताजीका कुचालमा लाज मर्नु भयो ।
बोलीमा नै सिमित भयो नेपालीको नाम ।
नेतागणको मगजमा कहिले लाग्ने घाम ?
विराटनगर