कति छन् छलछाम यहाँ
कति छन् कति छन् छलछाम यहाँ
मन हुन्छ छुरा मुख राम यहाँ ।
छलछाम सधैं बलियो छ अति
बरबाद गर्यो सब ठाम यहाँ
छलछाम गरी कन देश डुब्यो
विपरीत भए जब काम यहाँ ।
छलकै छ कथा कविता छलकै
छलमै चुलिए कति नाम यहाँ ।
छलछाम भयो घरमा वनमा
प्रतिदिन् लुटियो सुखधाम यहाँ ।
छल शासक भो छल भो मुखिया
छलले बटुले झन दाम यहाँ ।
कसरी छुटने छल बन्धन यो
छलमै खुसी छन् घनश्याम यहाँ ।
पुरानो नैकाप, काठमाडौं,
हाल– न्युयोर्क, अमेरिका