कोमल भट्टसम्मान आदिकवि
अग्ला ओत अनन्यका अतुलका आभा छ तिम्रो अति छौ रामायणमा र भक्तिरसमा साहित्यमा सम्प्रति तिम्रो नाम प्रसिद्ध लोकभरिमा आलोक छर्ने छवि श्रद्धा आदर आज जन्मदिनमा सम्मान अर्पेँ कवि ।

कोमल भट्ट :
भाषाका भरिला भरोस भवका भावार्थका भावक
भाषातात्विक भानुभक्त भरका भद्राक्ष भट्टारक
रम्घाका रमणीय राम रसका राजर्षिका रोशन
रच्ने रामकथा रसज्ञ रसिला रोजेर रामायण ~१
ओजस्वी युगका युगोचित प्रभा हे ! काव्यका साधक
देशाचार विचारमग्न बलिया संस्कार सञ्चालक
शुद्धात्मा शिरका प्रवाह प्रियता पौरुष्यका पल्लव
प्रज्ञापारमिता पिता प्रगुणका प्राक्कल्पना पालक~२
तत्कालीन समाज बोल्दछ बधू शिक्षा दियौ उत्तम
जे देख्यौ सहजै बताउन सक्यौ चैतन्यका चिन्तन
तिम्रा काव्य मिजासिला महकिला मीठा महाज्ञानका
मायाका मनका सुगन्ध सरिता सन्देशका शानका ~३
कैयौँ कालजयी कथेर कविता चौतर्फ चोर्यौ मन
पढ्दा ग्रन्थ गुणाढ्यका गहनका साफल्य भो जीवन
घाँसीका उपदेश दिव्य दरिला दीक्षा तथा प्रेरणा
पग्ल्यौ पूर्ण प्रभावले प्रण गर्यौ सत्कीर्ति संस्थापना ~४
अग्ला ओत अनन्यका अतुलका आभा छ तिम्रो अति
छौ रामायणमा र भक्तिरसमा साहित्यमा सम्प्रति
तिम्रो नाम प्रसिद्ध लोकभरिमा आलोक छर्ने छवि
श्रद्धा आदर आज जन्मदिनमा सम्मान अर्पेँ कवि~५
०००
चन्द्रागिरी नगरपालिका, वा.नं.१३ -पुरानो नैकाप, काठमाडौँ
हाल:- न्युयोर्क, अमेरिका
Subscribe
Login
0 Comments
Oldest








































