नेपाली हास्यव्यङ्ग्य अनलाइन पत्रिका

कुमार खड्का :

सपना पनि अशुभ हुन्छन्, कसैले पत्याउदैन
अनिष्टकारी समय मस्तिष्कले सोच्नै पाउदैन
अशुभ लक्षणहरु देखिन्छन्,निर्क्यौल गर्नसके,
दैवी विपत्ति कहिल्यै बाजा बजाएर आउदैन ।१

सतही दृष्टिमा पानी उम्लेको मात्रै देखिन्छ
कारण थाहा नहुँदा बन जलेको मात्रै देखिन्छ
सुक्ष्म दृष्टि चाहिन्छ गुणात्मक रुप बुझ्नलाई,
संख्यात्मक परिवर्तनले छलेको मात्रै देखिन्छ ।२

वितण्डाको आँधिबेहरीले यो मन डग्मगाएको छ
कतै पीडा, त्रासको ऐँठनले घाँटी अठ्याएको छ
आक्रान्त छ जनजीवन, हाहाकार, चौतर्फी यहाँ,
असामञ्जस्य थितिले प्रवल मौनता समाएको छ ।३

भैसक्यो हुनेहुनामि जो, अरुलाई दोष दिएर हुदैन
वितेका पल सम्झदै आँसुको घुट्को पिएर हुदैन
महसुस गर्न सकौं ! सारा आफ्नै दूर्भाग्य र कर्महरु,
भविष्य निम्ति सोचौं ! विपनामै झस्किएर हुदैन ।४

०००
आलापोट, काठमाडौं ।