नेपाली हास्यव्यङ्ग्य अनलाइन पत्रिका

कुमार खड्का : 

यता विश्वास टुटेपछि अन्तै भरोसा लाग्न सक्छ
पर्यावरण धूमिलतामा सारा दुविधा जाग्न सक्छ
हराउँछन् जब विवेक, इमानका खाताहरू,
आस्थाको एकाङ्कीले निमेकको बदला माग्न सक्छ ।
१

मनको निश्चलतामा सुखको मार्ग मिल्न सक्छ
उन्मुक्त शिलापत्रमा बेजोड खुसी खिल्न सक्छ
अन्तर्निहित आत्माले स्वयम् चिराग बाल्न सके,
दुराचारको साम्राज्य क्षणभरमा नै हिल्न सक्छ ।
२

अग्रजका जीवन दर्शन, कर्म हाम्रो आधार हुन्छ
धर्म, संस्कार, संस्कृतिको सबलतामै सार हुन्छ
सत्कर्म र दुष्कर्मबिचको युद्ध नै हो मानव चोला
हामीभित्रै सुसभ्यता छ, बुझ्न सके अपार हुन्छ ।
३

खाली भाँडो माग नभै दान गरेको हुन सक्छ
भरी भाँडो दानको हैन माग्दै भरेको हुन सक्छ
मिल्दैन तथ्य र कारण हजुर ! एकमना सोचले,
झुसी भाँडो झन् चोरी, लुटमै दरेको हुन सक्छ ।
४

०००
आलापोट, काठमाडौं