नेपाली हास्यव्यङ्ग्य अनलाइन पत्रिका

कविराज घिमिरे :

तमास गर्छ जिन्दगी म वृद्ध हो कि होइन
युवा समान जोसको छ चाल भिन्न पाइन
असी कटेँ विचार झन् हुँदै छ मूर्त पाउलो
चढूँ छ चाह शैलमा गरूँ सधैँ रमाइलो ।। १

बुढो हुँदैन कर्मका जरा सशक्त छन् भने
युवा हुनेछ वृद्ध त्यो सदैव आलसी बने
खपी अनेक ताडना बनेर प्रौढ आउँदा
चुरो बुझिन्छ कर्मको जहान ती रमाउँदा ।। २

शरीरका बगान यी मुजाविहीन पाउँदा
विकार क्लेश आपदा भुलेर गीत गाउँदा
कतै न दुख्छ घाउ यो न हुन्छ ख्याल शोकको
अहा ! हुनेछ जिन्दगी बुढाबुढी समस्तको ।। ३

कपाल फुल्छ चोटिलो टलक्क हैम माथमा
सदा प्रसन्न देखिने मुहार हुन्छ गाथमा
सफेद हार दन्तका यताउता हुँदा पनि
जडान फेरि गर्नु नै हुनेछ सौख्य जीवनी ।। ४

अझै निकै भऱ्याङ छन् पछाडि हेर्नु पर्दछ
कडा अगाडि हाँक छन् समाप्त पार्नु पर्दछ
यही अठोट वृद्धले लिए जितिन्छ दौडमा
हरेसका पला सबै निखार्नुपर्छ प्रौढमा ।। ५

लिने गरौँ सबैजना सही विचार तर्कना
सधैँ समाज दौडियोस् बुझेर सत्य सिर्जना
उदार हुन् बुढाबुढी भविष्यसम्म देखिने
समस्तका दिमागमा बसुन् कवै नमेटिने ।। ६

०००
भक्तपुर