नेपाली हास्यव्यङ्ग्य अनलाइन पत्रिका

कविराज घिमिरे :

आकाशका रवि बनी दिनरात खट्छन्
सन्तानका रहरका हरआँत पढ्छन्
हुन्नन् कुनै बखतमा अदना बिराम
यी ज्येष्ठ नागरिकमा छ सदा प्रणाम ।। १

मैला भगाउन पुगे पसिना बगाई
छन् आँट पर्वतसँगै पनि जुध्नलाई
जो वृक्षमा पिपल हुन् तुलसीसमान
यी ज्येष्ठ नागरिकमा छ सदा प्रणाम ।। २

गर्दै सधैँ हित अरूकन बाँच्न पाए
मान्छन् खुसी गजबले भव यो रमाए
यस्ता अलौकिक छटा जति छन् तमाम
यी ज्येष्ठ नागरिकमा छ सदा प्रणाम ।। ३

आफ्नो शरीर बसमा नहुँदा अरू झन्
सन्तान खातिर सधैँ मन भाव जाग्छन्
हुन् पोष ओखर सरी सबका मुहान
यी ज्येष्ठ नागरिकमा छ सदा प्रणाम ।। ४

कर्तव्यनिष्ठ हुनु नै अधिकार ठान्छन्
आत्मीय भाव फितलो नगरी रहन्छन्
यस्ता अपूर्व ऋषि हुन् सबका विधान
यी ज्येष्ठ नागरिकमा छ सदा प्रणाम ।। ५

कौमार्यदेखि शिशु वृद्ध समान देख्ने
सत्‌प्रेमको फल हुने इतिहास लेख्ने
यस्ता अजेय दरिला मनका प्रधान
यी ज्येष्ठ नागरिकमा छ सदा प्रणाम ।। ६

०००
भक्तपुर