नेपाली हास्यव्यङ्ग्य अनलाइन पत्रिका

सुभाषचन्द्र देवकाेटा :

नेताज्यूको
देश बनाउने हुटहुटी
हुटिट्याउँको आकाश थाम्ने हुटहुटी
आखिर उस्तै हो।

मौकामा हिरा नफोर्ने
समय बितेपछि भित्ता कोत्रने
नेताज्यूको बानी
चल्ला चोर्ने स्यालको कथा
आखिर उस्तै हो।

नेतै नेता
न एता न उता
एकादेशकी महारानी
कसले भर्ने पानी
नानीदेखि लागेको बानी
आखिर उस्तै हो।

नेतालाई कुर्ची
चम्चाहरूको फुर्ति
जनताको आँखामा छारो
आखिर उस्तै हो।

नेताको भर
तासको घर
न आगो न पानी
आकाशको फल
आँखा तरी मर
आखिर उस्तै हो।

नेता कुर्चीभोगी
जति खाए पनि नअघाउने अगस्ती
गाइको छालामा चितुवाको नाच
नाच्न नजान्ने आँगन टेढो
आखिर उस्तै हो।

नेता लोभी, मन पापी
जनताको घरमा नुन छैन
नेताको मनमा गुन छैन
चोरमाथि चण्डाल, नेताको कर्म
आखिर उस्तै हो।

०००
गाेरखा