वेदप्रसाद रिजालदसैँ मान्न पाऊँ सधैँ ज्येष्ठसाथ
म बाबामुमाका सँगै रम्न पाऊँ झुकी माथले पाउमा रम्न पाऊँ लिई सौम्य आशिष् सजाऊँ ललाट दसैँ मान्न पाऊँ सधैँ ज्येष्ठसाथ।
वेदप्रसाद रिजाल :
उनैले चिनाए सबै चाडपर्व
सँगै मान्न पायौँ यसैमा छ गर्व
झुकोस् पाउमा भक्तिका साथ माथ
दसैँ मान्न पाऊँ सधैँ ज्येष्ठसाथ।
मिठा छन् कथा यी नयाँ छन् बिहानी
सधैँ देख्छु उल्लासमा घामपानी
त्यसैमाथि पाकाहरूको छ साथ
दसैँ मान्न पाऊँ सधैँ ज्येष्ठसाथ।
निभाएर विद्वेषको अग्निलाई
म बाँचूँ सही भावनामा रमाई
बिसन्चो नहोस् ज्येष्ठको नित्य गाथ
दसैँ मान्न पाऊँ सधैँ ज्येष्ठसाथ।
नभोगून् कुनै वृद्धले तुच्छ हेला
न सन्तानमा होस् नराम्रो झमेला
खुसीमा रमाओस् युवाको जमात
दसैँ मान्न पाऊँ सधैँ ज्येष्ठसाथ।
म बाबामुमाका सँगै रम्न पाऊँ
झुकी माथले पाउमा रम्न पाऊँ
लिई सौम्य आशिष् सजाऊँ ललाट
दसैँ मान्न पाऊँ सधैँ ज्येष्ठसाथ।
०००
२०८३/०६/२८/४
Subscribe
Login
0 Comments
Oldest
