नेपाली हास्यव्यङ्ग्य अनलाइन पत्रिका

कविराज घिमिरे पुछारघरे :

छन् शैलमा ब्रह्माण्ड नै बिर्साउने खानीहरू
छन् तेलका भन्डार झन् ती फाँटमा कैयौँ अरू
नेपालका यी सम्पदा देखेर उठ्तै छन् चिता
भूभाग वैरी ताक्तछन् हाम्रो बचाऔँ अस्मिता ।। १

नेतृत्वकर्ता छन् खुनी विक्री हुँदै छन् झोलमा
हेर्दा दुरुस्तै देखिने हुन्छन् अनेकौँ खोलमा
हामी प्रजाको एकता अक्षुण्ण पारौँ पूर्णता
भूभाग वैरी ताक्तछन् हाम्रो बचाऔँ अस्मिता ।। २

छन् लिम्पियाका दुर्दशा ताक्तै छ कोही दुर्जन
होउन् यहाँ नेताहरू यो राष्ट्र हाँक्ने सज्जन
हामी प्रजा छौँ हिम्मती गर्छौँ सबैले सञ्चिता
भूभाग वैरी ताक्तछन् हाम्रो बचाऔँ अस्मिता ।। ३

जङ्गे उखेल्दै फ्याँक्तछन् आमा पुकार्छिन् सन्तति
आवाज हाम्रो उर्लियोस् सम्पूर्ण जोडौँ सम्मति
आकाश धर्तीसम्ममा फैलिन्छ धावा दीर्घता
भूभाग वैरी ताक्तछन् हाम्रो बचाऔँ अस्मिता ।। ४

वृद्धाहरू वा वृद्ध हुन् निस्केर तन्नेरी सबै
घेरौँ इलाका जे परोस् झन् एकता देखाउँदै
को टिक्छ हाम्रो सामुमा बन्नेछ आफैँ रिक्तता
भूभाग वैरी ताक्तछन् हाम्रो बचाऔँ अस्मिता ।। ५

०००
भक्तपुर