नेपाली हास्यव्यङ्ग्य अनलाइन पत्रिका

कविराज घिमिरे :

वृद्ध हुन् कि वा युवा समस्त बाल प्रौढ हुन्
फाँटका हिमालका पहाडका जता रहुन्
हुन्छ घात ख्याल होस् गुनौँ विचार ध्यानले
शक्ति घट्छ व्यक्तिको धुवाँ र मद्यपानले ।। १

खासमा दिमागको असक्त हुन्छ सम्झना
रोगले अँचेटिँदा अनेक हुन्छ वेदना
श्वासमा अधीनता हुँदैन छोड्छ ज्यानले
शक्ति घट्छ व्यक्तिको धुवाँ र मद्यपानले ।। २

बाहिरी रमाइले हुनेछ खर्च दोगुना
सानमान गिर्छ झन् इमान घट्छ चौगुना
छोड्दछन् भलादमी कुचाल दुर्बयानले
शक्ति घट्छ व्यक्तिको धुवाँ र मद्यपानले ।। ३

उड्न सक्छ पक्ष के ? अकासमा धुवाँ भए
चल्न सक्छ यान के ? उडाकुव्यक्ति आत्तिए
हेयदृष्टि राख्तछन् समाज वा जहानले
शक्ति घट्छ व्यक्तिको धुवाँ र मद्यपानले ।। ४

पात्र हुन्छ ढाँटको गरेर दुष्टसङ्गत
फेर्छ शब्द आत्तिँदै हुँदैन स्वस्थ मस्तक
ज्ञानका कुरा हुँदा उडाइदिन्छ कानले
शक्ति घट्छ व्यक्तिको धुवाँ र मद्यपानले ।। ५

ठान्छ मित्र शत्रुझैँ बसाल्छ शत्रु काखमा
पत्रु नै हुनेछ ऊ गिरेर हिँड्छ लाखमा
त्याग्नुपर्छ घातका सबै कुरा जबानले
शक्ति घट्छ व्यक्तिको धुवाँ र मद्यपानले ।। ६

०००
भक्तपुर