नेपाली हास्यव्यङ्ग्य अनलाइन पत्रिका

रणबहादुर बुढाथोकी “भैया” :

वल्लो घरको नरे पल्लो घर सरे
घरकी बुढी छोडेर अर्कीको भर परे
जेठी लागिन् घिच्च्याउन कान्छी लागिन् चिच्याउन
बुढेसकालमा बुढोले थपे बिछ्याउना।

लथालिङ्गे उनको घरको भताभुङ्गे चाला
भन्थे सौता लघार्नेले घर गरेर खाला
स्वयंवरको औँठी मासी तरुणीको माला
कान्छी नलिई जान्न भन्थे गए गर्धन जाला।

वल्लो घरको नरे पल्लो घर सरे
घरकी बुढी छोडेर अर्कीको भर परे
जेठी लागिन् घिच्च्याउन कान्छी लागिन् चिच्याउन
बुढेसकालमा बुढाले थपे बिछ्याउना I

दुइवटी स्वास्नीको पोइ कुना पसी रोई
छोराहरू फुट्न थाले दुहुनासम्म दोइ
छोरी पनि त्यस्तै रैछन् नजिक हुन्नन् कोइ
बुढेसकालको आडभरोसा जेन्जी पुस्ता खोइ ?

वल्लो घरको नरे पल्लो घर सरे
घरकी बुढी छोडेर अर्कीको भर परे
जेठी लागिन् घिच्च्याउन कान्छी लागिन् चिच्याउन
बुढेसकालमा बुढोले थपे बिछ्याउना I

आफन्तले पाइला मोडे जिउन कति गाह्रो
खाइपाइआको सुबिधा चट कल्ले हाल्ने चारो
आजभोलि ह्वासह्वास्ती गन्ध आउँछ दारु
अझ पनि चेत खुल्दैन भन्छन् क्यारूँ क्यारूँ।

वल्लो घरको नरे पल्लो घर सरे
घरकी बुढी छोडेर अर्कीको भर परे
जेठी लागिन् घिच्च्याउन कान्छी लागिन् चिच्याउन
बुढेसकालमा बुढोले थपे बिछ्याउना I

०००
बूढानीलकण्ठ – ८ हात्तीगौँडा, काठमाडौँ,