नेपाली हास्यव्यङ्ग्य अनलाइन पत्रिका

खगेन्द्र नेउपाने :

मान्छे मात्रै हाेइन
शब्दहरु पनि पदमा बस्छन्
र
पद सकिनासाथ आफ्नै अर्थमा फर्कन्छन् ।

कति शब्दहरु नाम मात्रका
कति अलङ्कार र विशेषणले भरिएका
कति शब्दहरु निरन्तर क्रियामा
कति सम्बन्ध सम्झाैतामा खटिएका ।

नाम मात्रका शब्दहरु पनि थरीथरीका
काेही व्यक्तिवादी , काेही जातीवादी
काेही कञ्जुस द्रब्यवादी
काेही उदार भाववादी
काेही गणित काेही अगणित
काेही एकलकाँटे काेही समूहवादी
काेही जीवन काेही निर्जीवन ।

कतै शब्दहरु मानमा कतै अभिमानमा
कति विशेष्यमा कति विशेषणमा
शब्दलाई शब्दकै चाकरी चाहिन्छ
आफू नेता अरुलाई कारिन्दा बनाइन्छ
तर पनि
कति शब्दहरु निरन्तर काममा छन्
नाम र विशेषणहरुका परिणाममा छन्
कहिल्यै रुप नबदल्ने
आफ्नै स्वाभिमानमा चल्ने
सबैलाई मिलाउन खाेज्ने
बरु आफू नै बिलाउन खाेज्ने
सबै सबै शब्दहरु पनि बेलाबेला पदमा हुन्छन्
पद सकिनासाथ
आफ्नै अर्थमा फर्कन्छन् ।

०००
गाैरादह, झापा