नेपाली हास्यव्यङ्ग्य अनलाइन पत्रिका

लक्ष्मण नेवटिया :

​भित्र घोचिएको बाण,
छैन कतैबाट त्राण।
तैपनि ओठमा मुस्कान,
घरको सम्झनाले जोगाएको छ ज्यान।
उफ् ! विदेशिएको जिन्दगी !

​आमाको मनमा पीर,
नानी-बाबु भेट्न अधीर।
दशैँमा भारी बोकेको शिर,
उपलब्धि बालुवा मिसेको खीर।
उफ् ! विदेशिएको जिन्दगी !

​नङ्ग्रा खियाएर, आँसु पिएर,
अरूको घर उज्यालो पार्छ,
आफ्नो गाउँघर सम्झिएर।
बाँचेको छ आश लिएर,
उफ् ! विदेशिएको जिन्दगी !

जवानी परदेशमा बगायो,
रहर सबै मनमै दबायो।
घर फर्कने विश्वासमा,
सारा जीवन गुमायो।
उफ् ! विदेशिएको जिन्दगी !

​जति लुकाए पनि पीडा,
रात परेपछि निस्कन्छ।
सपना आएर जिस्कन्छ,
घर सम्झेर मुटु बिच्किन्छ…
उफ् ! विदेशिएको जिन्दगी !

०००
विराटनगर