नेपाली हास्यव्यङ्ग्य अनलाइन पत्रिका

लक्ष्मण नेवटिया :

नानी बाबा भेट्न अधीर
दशैँमा भारी बोकेको शिर
सुख बालुवा मिसेको खीर
उफ्! दशैंमा विदेशिएको जिन्दगी!

भित्र घोचिएको बाण
छैन कतैबाट त्राण
तैपनि ओठमा मुस्कान,
घरको सम्झनाले जोगाएको छ ज्यान।
उफ्! दशैंमा विदेशिएको जिन्दगी!

​नंग्रा खियाएर, आँसु पिएर,
अरूको घर उज्यालो पार्छ
आफ्नो गाउँघर सम्झिएर।
बाँचेको छ आश लिएर
उफ्! दशैंमा विदेशिएको जिन्दगी!

​जवानी परदेशमा बगायो,
रहर सबै मनमै दबायो,
घर फर्कने विश्वासमा
सारा जीवन गुमायो।
उफ्! दशैंमा विदेशिएको जिन्दगी!

​जति लुकाए पनि पीडा,
रात परेपछि निस्कन्छ।
सपना आएर जिस्कन्छ,
घर सम्झेर मुटु बिच्किन्छ…
उफ् ! दशैंमा विदेशिएको जिन्दगी !

०००
विराटनगर