नेपाली हास्यव्यङ्ग्य अनलाइन पत्रिका

लक्ष्मण नेवटिया :

​हाम्रो मौनताले गर्दा उनलाई आराम छ,
सत्यको सिरानीमा असत्यको मुकाम छ।
सही बाटो लाग्ने माथि आरोप तमाम छ।
दाग किन देखाइस भनी ऐना बदनाम छ।। १।

​दुष्चरित्र चर्चित यहाँ, चोखो गुमनाम छ,
भाषणको भीडमा नैतिकता लिलाम छ।
झूटको पोको बोक्नेले पाउँछ इनाम छ,
दाग किन देखाइस भनी ऐना बदनाम छ। २।

​कलमको मोल सस्तो, कुर्सीको चर्को दाम छ,
आँखा चिम्ली बस्नेलाई गरिन्छ सलाम छ।
प्रश्न सोध्ने जिब्रोलाई थुन्ने कडा इन्तजाम छ,
दाग किन देखाइस भनी ऐना बदनाम छ। ३।

​यथार्थ लुकाउन सधैँ महँगो तामझाम छ,
इमान बेकाम गर्न झूटको छलछाम छ।
पसिना बगाउनेको पेटमा भोक अविराम छ,
दाग किन देखाइस भनी ऐना बदनाम छ।। ।४।

०००
विराटनगर