नेपाली हास्यव्यङ्ग्य अनलाइन पत्रिका

मुक्ति अस्तित्व :

यो देश अग्रगामी तर्दै जँगार तीव्र ।
नेपाल नाम जागोस् संसारमा विचित्र ।।
सत्कर्म कीर्ति पाओस् सम्पूर्ण राष्ट्रमाझ ।
आधार ज्येष्ठको होस् साथी बनोस् समाज ।। १ ।।

सत्कर्म प्राप्त गर्ने संस्कारमा रहेर ।
सत्कार गर्नु पर्ने विश्वासमा परेर ।।
ती वृद्धबाट सिक्ने अध्याय हुन्छ आज ।
आधार ज्येष्ठको होस् साथी बनोस् समाज ।। २ ।।

सुन्ने कुरा बुढाको भन्ने भनाइ हाम्रो ।
बच्चा सुधार खाका बन्ने रहेछ राम्रो ।।
माता पिताहरूको आफू बनेर दास ।
आधार ज्येष्ठको होस् साथी बनोस् समाज ।। ३ ।।

दैवीप्रकोप पर्दा पाका बनुन् सहारा ।
जेठा असाध्य ज्ञाता सिक्छन् युवा पियारा ।।
आदेशमात्र पाए चल्नेछ कामकाज ।
आधार ज्येष्ठको होस् साथी बनोस् समाज ।। ४ ।।

साँच्चै विकास ल्याऊँ फड्को हजार मार्दै ।
सम्पूर्ण कार्य गर्ने पट्ठा अगाडि सर्दै ।।
आज्ञा लिएर आऊ देऊ युवा निकास ।
आधार ज्येष्ठको होस् साथी बनोस् समाज ।। ५ ।।

०००
मो. नं. : ९८४२६२५०५७
बिर्तामोड, झापा