नेपाली हास्यव्यङ्ग्य अनलाइन पत्रिका

लक्ष्मण नेवटिया :

​१.
​बादल र मानिस
बादलमा छ निःस्वार्थ प्रेम
मानिसमा छ स्वार्थको खेती
फरक त छ।

​२.
​बादल र मानिस
बादलले वर्षा दिन्छ जीवनको
मानिसले आँसु दिन्छ पीडाको
फरक त छ।

३.
​बादल र मानिस
बादलले सजावट गर्छ समष्टिको
मानिसले बिगार्छ स्वरूप सृष्टिको
फरक त छ।

​४.
​बादल र मानिस
बादलले शीतलता छर्छ धर्तीभरि
मानिसले ताप थरीथरी घरीघरी
फरक त छ।

​५.
​बादल र मानिस
बादलले सबैलाई सिञ्चन गर्छ समान
मानिसले आफन्तलाई मात्र भई बेइमान
फरक त छ।

​६.
​बादल र मानिस
बादल विनम्र भएर गर्छ हावाको सवारी
मानिस उक्लेर पनि बन्छ अहंकारी
फरक त छ।

७.
​बादल र मानिस
बादलले हरियालीको गीत गाउँछ
मानिसले प्रदूषण मात्र निम्त्याउँछ
फरक त छ।

०००
विराटनगर