नेपाली हास्यव्यङ्ग्य अनलाइन पत्रिका

हेम अधिकारी

भदौ लाग्दालाग्दै दशदिन बिहानीतिर अहो !
त्रियासीमा आयो अतिशय ठुलो बाढ पहिरो
खसेको ढुङ्गाको हिमपुरित पाखो र पहरो
लगेको खोलाले सबतिर बगाएर गहिरो ।।१

हिमाली पाखो त्यो द्रुत बगिगयो त्रासद भयो
लहेन्दे, भोटेको कहर जनको काल बनियो
असङ्ख्यै उर्लेको कति कहरिलो बाढ नदमा !
बगायो सर्वत्रै कहनु कसरी त्रास मनमा ।। २

कठै राम्रा ! बस्ती नगर सब नामेट बनिए
अनेकौँ मान्छेका धनजन सबै साफ हरिए
नदीमा बग्रेल्ती शव कति जनासाथ छरिए
लगेका बाढीले कति जमिनका गर्भ पुरिए ।।३

बगी आयो जम्मै हिमशिखर गेग्र््यान कुँडुलो
लगी मास्यो जम्मै घर, सहर बस्ती सब उँधो
सबै प्राणी मा¥यो धन कति गयो के अब भनौँ
लगेको बाढीले सब कति भनौँ के अब गनौँ !! ४

झरी भोटेकोसी जलधिसरि भो गण्डक अनि
नराखी नामेटै सब लगिगयो सम्पति पनि
कता भाग्ने लुक्ने क्षणभर सबै ध्वस्त बनियो
बगायो मा¥यो है असुर त्रिसुली भक्षक भयो ।। ५

ठुला राम्रा राम्रा सहर पुरिए बालु बगर
उता बस्ती जम्मै क्षणिकभरमा काल कहर
यता बाँच्ने रुन्छन् नयनबिचका आँसु सकिए
कता आफन्तीको मिलन कसरी हुन्छ र सखे !! ६

०००
दमक, झापा