देवीप्रसाद मिश्रवृद्ध श्रेष्ठ हाम्रा आदर्शका छहारी
अन्याय न्याय हेर्ने चौडा बनाई छाती ठान्छन् समाजघाती जो हुन्छ पक्षपाती । सम्मान गर्न जानौं कर्तव्यमा नहारी हुन् वृद्ध श्रेष्ठ हाम्रा आदर्शका छहारी ।।
देवीप्रसाद मिश्र :
सङ्कल्प सत्य जप्तै सन्तानका निमित्त
सम्भाव्य खोज गर्छन लाएर दत्तचित्त ।
जीवन्त साधनामा, बन्छन् परोपकारी
हुन् वृद्ध श्रेष्ठ हाम्रा आदर्शका छहारी ।।१।।
बन्दै दलान आफैं थाम्दै अमाल सारा
चम्काउँदै उज्याला सत्कर्मका सितारा ।
गोडेर राख्न सक्ने उद्यान फूलबारी
हुन् वृद्ध श्रेष्ठ हाम्रा, आदर्शका छहारी ॥२॥
कर्तव्यबोध गर्दै बाँड्छन् विचार शुद्ध
अज्ञानता बढार्छन् छन् ज्ञानका प्रबुद्ध ।
आलोक सभ्यता वा, संस्कारका पुजारी
हुन् वृद्ध श्रेष्ठ हाम्रा आदर्शका छहारी ॥३॥
छन् सोच अग्रगामी सङ्कीर्ण छैन बानी
बर्सिन्छ प्रस्ट वाणी दृष्टान्तमा इमानी ।
प्रत्यक्ष ईशजस्तै आह्लाद ज्ञान धारी
हुन् वृद्ध श्रेष्ठ हाम्रा आदर्शका छहारी ।।४।।
अन्याय न्याय हेर्ने चौडा बनाई छाती
ठान्छन् समाजघाती जो हुन्छ पक्षपाती ।
सम्मान गर्न जानौं कर्तव्यमा नहारी
हुन् वृद्ध श्रेष्ठ हाम्रा आदर्शका छहारी ।।५।।
०००
काठमाडाैं
गज्जब राम्रो रचना 💐