नेपाली हास्यव्यङ्ग्य अनलाइन पत्रिका

देवीप्रसाद मिश्र

शिक्षाले पूर्ण ठान्छाैँ अनुचर अहिले ज्ञान बाेक्राे छ साथ ।
खासै भेटिन्न राम्रो अनुभव नहुँदा तालिकामा प्रभात ।।
आशा छन् लक्ष्य चुम्ने धरमर नबनूँ, चेतनाले उचालून् ।
राखून् सद्भाव पाका परिजनबिचमा ज्ञानले दीप्त पारून् ।। १।।

साथैमा स्वार्थ भाँडो प्रतिपल रहँदा भर्न चाँडो छ आस ।
तम्सिन्छाैँ भावनामा कतिपय बहँदै अन्त्यमा छाैँ निराश ।।
फाल्दै टाढा समस्या सफल प्रगतिकाे सभ्य बाटो खुलाऊन् ।
राखून् सद्भाव पाका परिजनबिचमा ज्ञानले दीप्त पारून् ।।२।।

सर्वात्मा, प्राज्ञ खाेज्दा,जनहित अगुवा साथ हाम्रा थलामा ।
पाका छन् सर्वदाता गुरुजन दरिला,दक्ष सङ्ला कलामा ।।
बाटो भुल्दा युवाले विचलित नबनाैँ हात तान्दै हिँडाऊन् ।
राखून् सद्भाव पाका परिजनबिचमा ज्ञानले दीप्त पारून् ।। ३।।

पायाैँ याे जन्म आयाैँ अगणित अघिका कर्मले मृत्तिकामा ।
धेरै छन् कार्य हाम्रा जनहित क्रमले गर्नुपर्ने थलामा ।।
कच्चा नै छाैँ सदाका अनुज मगजमा चेतना चम्चमाऊन् ।
राखून् सद्भाव पाका परिजनबिचमा ज्ञानले दीप्त पारून् ।। ४।।

बाँड्ने सत्प्रेरणाले अनुभव सँगका विश्व घुम्दा प्रसिद्ध ।
भेटिन्नन् खास त्यस्ता कुमुदित मनका छन् जहाँ वृद्धवृद्धा ।।
सेवामा कत्ति हामी अनुचर नचुकाैँ हर्षले मुस्कुराऊन् ।
राखून् सद्भाव पाका परिजनबिचमा ज्ञानले दीप्त पारून् ।। ५।।

०००
काठमाडाैं