नेपाली हास्यव्यङ्ग्य अनलाइन पत्रिका

श्याम प्रधान :

के रहेछ जिन्दगी
एक छिन अघि कुरा गर्दै थियौँ
कुरा नटुङ्गिदै
खोई कता हरायो
तिम्रो त्यो वाणी
तिम्रो त्यो शक्ति
एकछिन त म अलमलमा परेँ
विज्ञानले दिएको सुबिधा
प्राविधिक कारण बन्द भयो
कि सोचेँ
मेरो अनुमान गलत भयो
तिमी त विज्ञान भन्दा पर पुगेछौ
पर पनि धेरै पर
फेरि नआउने गरी पर पुगेछौ
मसँग कहिल्यै नभेट्ने गरी
बिदा पो लिएको रहेछौ

क्षणभरमै अनेकन समाचारले
मोबाइल भरिन थाल्यो !

तिमी उभिएको धरती त
आफै महाविपत्तिमा डुबेको रहेछ
बाढीमा पो बिलाएको रहेछ

नपत्याउनु मेरो भ्रम
मैले त्यही भ्रममा सत्य खोज्ने प्रयास गरे
के तिमी आउन्नौ
र साँच्चै कहिल्यै आउन्नौ

विधिको विधान अगाडि
तिमी लाचार भएका थियौ
म लाचार भएको छु

तर पनि म बाँचेर के नै गर्छु
भन्ने सोचमा डुबेँ
मृत्युको सत्यले मलाई
बाँच्नु पर्ने आँट दियो

आखिर हामी मर्न त जन्मिएका हौँ
आफ्नै सानो संसारको निर्माण गरेर
नफर्किने गरी जानु त छ नै
अलग अलग बाटो भएर !

०००
काठमाडाैं