नेपाली हास्यव्यङ्ग्य अनलाइन पत्रिका

हेमराज पन्त :

भैंसी छ निर्धो सब दूध तानी ।
हो निर्घिणी मानव,दुष्ट बानी ।।
मौका मिले रक्त चुसी समारो ।
देख्दै छु मैले पशुको कमारो ।।
१

आहालको कष्ट सही बसेको ।
खै घाँस,पानी बलले कसेको ।।
मान्छे बने दानवतुल्य घाती ।
चुस्दा सधैं दूध फुलेछ छाती ।।
२

सोझा सयौं जीवन लास जस्तै ।
मिल्थ्यो कथा जीवनको दुरुस्तै ।।
हेर्दा बडो रोचक झैँ कहानी ।
छोप्दै निशा जीवनको बिहानी ।।
३

खोज्थे छहारी वन, भीर, पाखा ।
भोको बनी पेट सुसेल्छ भाका ।।
माली मरे झैँ टुहुरो छ गाई ।
राँगा बसे होटलमा रमाइ ।।
४

गैंडा र हात्ती झन बुद्धिमानी ।
सृङ्गाल गर्जे डर नै नमानी ।।
पोतिन्छ केले मनमा निराशा ।
भैंसी चुसी खेल्दछ खेल पाशा ।।
५

०००
पाटन २ सिलङ्गा, बैतडी