नेपाली हास्यव्यङ्ग्य अनलाइन पत्रिका

हेमराज पन्त :

बिर्को लाग्छ दिमाग चेतन मरे खुल्दैन केही गरे ।
पापीको छलछाममा जब परे विद्वान् ज्ञानी डरे ।।
रित्ता पेट गरीबका दिनदिनै भोका जुकाले चुसे ।
सारा दीन निचोरिँदा मुलुकका बस्थे डकारी झुसे ।।
१

नाङ्गो आँत चिथोरिँदा वदनको सुन्दैन कोही हरे ।
मारी आश युवा पुगे बगरमा घोप्टे तलामा सरे ।।
ठोक्कायौ बलिदान वाद बलमा मर्थे सधैं सज्जन ।
देखायौ सपना अनेकपनका पीडा दुखायौ झन ।।
२

आशामात्र छ गाँस,बास,कपडा सौगात दिन्छौ भय ।
ताजा ज्ञान निचोरिँदा मुलुकमा रोगी छ शिक्षालय ।।
कोठा,वस्त्र,अनाज वेतन झिनो भण्डार रित्तो भयो ।
मात्रै मिल्छ तनाव जीवनभरी आक्रान्त साक्षी छ यो ।।
३

खल्तीको रुपियाँ र अन्न मुखको सन्तोष झर्दै गयो ।
माया,आदर,हर्ष यो मुलुकका खै के भयो के भयो ।।
सक्छौ साथ मिली बचावट गरौँ नेपाल बोकी बस ।
सक्दैनौं यदि राष्ट्र बोक्न शिरमा कालो गुफामा पस ।।
४

भाषा, धर्म, कला, अमूल्य निधि यी संस्कार हाम्रो कडी ।
नेपालीपनमा छ मौलिकपना शृङ्गार बेग्लै जडी ।।
हाम्रा मौलिक चाडपर्व मुटु झैँ जोडेर नौलो लय ।
गर्दै बस्छु म वन्दना मुलुकको नेपाल आमा जय ।।
५

०००
पाटन- २, सिलङ्गा, बैतडी