नेपाली हास्यव्यङ्ग्य अनलाइन पत्रिका

हेमराज पन्त :

आचारमा दुष्ट छ मिष्ट बोली ।
यो लेखनी लेख्दछ शब्द घोली ।।
संस्कारका साथ विवेक खाली ।
रोगी बनी मर्दछ हन्तकाली ।।
१

देख्दा थियो सभ्य र शिष्ट जस्तो ।
बुझ्दा असाध्यै पटमुर्ख कस्तो ।।
मैमत्तमा रम्दछ तुच्छ घाती ।
चुस्के जुका जङ्गलको छ साथी ।।
२

जो खन्चुवा हो उहीँ देख्छु कालो ।
फैली रहेको छ दलाल जालो ।।
त्यो मुर्ख आफै किन ठान्छ ज्ञानी ।
दुख्दै थियो कल्मषको बिहानी ।।
३

जो चोर आफै झन बोल्छ चर्को ।
चिप्ले किरा बन्दछ हेर अर्को ।।
यी भ्रष्टका भ्रष्ट अनेक खाले ।
के चोर नै बन्दछ आज पाले ।।
४

के लाशको दास बनेछ ढोंगी ।
कात्रो लपेटे पनि नग्न रोगी ।।
के वस्त्रले छोप्दछ लाज सारा ।
फालौं सबै दुर्जन भातमारा ।।
५

जोडिन्छ केले मन जीर्ण टालो ।
संसार गोला छ र घुम्छ पालो ।।
तिम्रो तिमी हौ नचिने मलाई ।
कोरे बाल्ने छु मसी,सलाई ।।
६

०००
पाटन २ सिलङ्गा,बैतडी