नेपाली हास्यव्यङ्ग्य अनलाइन पत्रिका

ओम आचार्य :

अधुरा सपना दुबिधा विपना
अति प्रष्ट चिरा चिरिने नमुना
अदना सठका छिचिरा थुतुना
खिचलो घरमा मतिका बुटुना ।१।

जगको भर छैन बलो र धुरी
धमिरैधमिरा खतरा बुकुरी
दल हो कि त बादल भै चल हो
बुझिदैन यसै खल या छल हो ।२।

कति प्वाल परे कति प्वाल भरे
छलछाम गरे कति जाल परे
जति फूल फुले फलनै कुहुने
बल राम बने बलनै नहुने।३।

जति साँढ बढे उतिनै उछितो
जति मात बढे उतिनै पछुतो
विधि मिच्न सबै सयमा सय छन्
गति वेग खली भलका लय छन् ।४।

जनता छ कता न यता न उता
दुःखमा छ विपत्ति झनै थपिँदा
जन, गास र बास रुवा पुरियो
शवको पहिचान सबै तुरियो।५।

पटके छुकका चटके रमिता
गति कान फुटे नसुनौ अब ता
सुनिदैन सुक्यो स्वर मानवता
छल युध्द दया करुणा ममता।६।

०००
अर्घाखाँची।