नेपाली हास्यव्यङ्ग्य अनलाइन पत्रिका

डा. अमर गिरी :

कठिन समयमा
बचाएको छ आशाले
यसको अनुपस्थितिको कल्पना
लाग्छ कुनै
भयानक दुर्घटना जस्तै
र जीवनको बत्ती
एकाएक निभेको अनुभूति हुन्छ
जीवनको बाटोमा ।

धेरै वर्ष पहिले
एक साँझ
मधुरो प्रकाशमा बत्तीको
कथा सुनाउँदै
भनेकी थिइन् आमाले
आशा उज्यालो हो जीवनको
मर्न नदिनु
सम्हालेर राख्नु जीवनभर ।

आशाको अक्षरबाट
निर्मित छ जीवनको अर्थ
जीवनप्रति प्रेमको बुनोटमा
आशा छ
जीवनको गरिमा
आशाको सङ्गीतमै बोल्छ
आशाको नृत्यबाटै
निःसृत हुन्छ
जीवनको सौन्दर्य
आशा बगिरहने नदी
चम्किरहने तारा र
उडिरहने चरा ।

गिट्टी कुटिरहेको
मानिसको जीवनबाट
आशा निभ्यो भने के हुन्छ ?
विभेदका विरुद्ध
हिंडिरहेका खुट्टाबाट
आशा गायब .
भयो भने के हुन्छ ?
क्रुरताको प्रतिवाद गरिरहेको
विवेकबाट
आशा हरायो भने के हुन्छ ?
सुन्दर स्वप्न देख्ने आँखाबाट
आशा मऱ्यो भने के हुन्छ ?
यस्ता प्रश्न
गर्न पनि डर लाग्छ ।

आशाकै आवासमा बसेर
मानिस
जीवनको रचना गर्छ ।

०००
दाङ