डा. अमर गिरीधोका
सुन्दर शब्दमै तिनले डढेलो लगाए देशमाथि र डढिरहेको देशमा आफ्नो पिठ्यूँ सेकाए तिनले जे जति धोका दिए देशलाई सुन्दर शब्दमा दिए सुन्दर शब्दमा तिनले उल्ट्याउन खोजे इतिहासलाई ।
अमर गिरी :
प्रायः धोका सुन्दर शब्दमा हुन्छ
शब्दमा प्रकट हुनुभन्दा पहिले
यसले छनोट गर्छ सुन्दर शब्दहरूको
सुन्दर शब्दहरूको खोजीमा
कहिलेकाहीं
वर्षाैं बित्छ
वर्षों पछि
सुन्दर शब्दहरूले सजाइएको डोलीमा
नयाँ बेहुलीफैँ प्रकट हुन्छ ऊ ।
जस जसले धोका दिए यस देशलाई
सुन्दर शब्दमै दिए
सुन्दर शब्दमै
तिनले हत्या गरे विश्वासको
सुन्दर शब्दमै
तिनले हत्या गरे
वर्षाैंदेखि सङ्गालेका सुन्दर स्वप्नहरूको
सुन्दर शब्दमै
तिनले डढेलो लगाए देशमाथि
र डढिरहेको देशमा आफ्नो पिठ्यूँ सेकाए
तिनले जे जति धोका दिए देशलाई
सुन्दर शब्दमा दिए
सुन्दर शब्दमा
तिनले उल्ट्याउन खोजे इतिहासलाई ।
सुन्दर शब्द र धोका
सनातन सम्बन्ध छ यी दुई बीचमा
सुन्दर शब्दहरूमा
अझै जारी छ
धोकाको डरलाग्दो सिलसिला ।
०००
शब्दहरूको बीचमा (२०७१)
घतलाग्दो कविता