डा. अमर गिरीपाखण्ड
तालीको गडगडाहटले स्वागत हुनेछ उसको सम्भाषणको तर कोठामा पर्खिरहेको हुनेछ उसलाई कुनै अज्ञात मानिसले भूमिगत तरिकाले पठाइदिएको कालो ब्रिफकेसले ।
डा. अमर गिरी :
उसले लेख्नेछ
नारीमुक्तिको सुन्दर कविता
तर रातमा हुनेछ
कुनै अपरिचित स्त्रीको सयनकक्षमा ।
उसले लेख्नेछ
राष्ट्रवादको अब्बल दर्जाको लेख
नाम चलेको अखबारले
छाप्नेछ शीर्ष स्थानमा
तर उसको शरीरबाट
गन्ध आउनेछ अर्कै माटोको
अर्कै माटोमा फलेको
हीराको हार हुनेछ उसको गलामा ।
उसले दिनेछ
नैतिकताको सम्भाषण
सर्वोत्कृष्ट सम्भाषणबाट
मन्त्रमुग्ध हुनेछन् मानिसहरू
तालीको गडगडाहटले
स्वागत हुनेछ उसको सम्भाषणको
तर कोठामा
पर्खिरहेको हुनेछ उसलाई
कुनै अज्ञात मानिसले
भूमिगत तरिकाले पठाइदिएको
कालो ब्रिफकेसले ।
प्रेमको छातीमा चलाउनेछ हतियार
भन्नेछ प्रेम जिन्दावाद
चुँड्नेछ फूललाई
भन्नेछ फूल जिन्दावाद
विवेकलाई मारेर उसले
गाउने छ विवेकको अमरता ।
०००
शब्दहरूको बीचमा (२०७१)
सुन्दर कवितन