नेपाली हास्यव्यङ्ग्य अनलाइन पत्रिका

डा. अमर गिरी :

एक लय छ नदीहरूसँग
वृक्षहरूसँग एक लय छ
हावालाई अँगालो हालेर
शारदीय घाममा नाचिरहेका धानका बाला
प्रचण्ड घामले बनाएका घाउहरूलाई
सुमसुम्याउँदै फक्रिरहेका गुलाब
पुसको चिसाेमा खोरिया खनिरहेका किसान
र उनीहरुको निधारबाट धर्तीको
स्पर्शका निम्ति खसिरहेको पसिना
एक लय छ त्यहाँ पनि ।

एक लय छ ब्रह्माण्डसँग
पृथ्वीसँग एक लय छ
एक लय छ सूर्यसँग
चन्द्रमासँग एक लय छ
स्त्रीका निधारमा चम्किरहेका टिकुलीझैं लाग्ने ताराहरूसँग एक लय छ
जब बाँसुरी अद्वितीय लयमा बज्छ
जब हार्मोनियमको स्वर लहरिन्छ लयमा
बज्न सुरु गर्छ हृदय र अपूर्व आनन्दको अनुभव हुन्छ
जब असाधारण लयमा प्रस्तुत हुन्छन् नृत्याङ्गना
र उनीहरूको नृत्यबाट निःसृत हुन्छ एक अनुपम सुगन्ध
त्यस सुगन्धसँग आफै नाचिरहेझैं लाग्छ
जब एउटा विलक्षण गीत गाइन्छ अद्भुत लयमा
आफै गीत बनिरहेझैं लाग्छ ।

हामीसँग भएको हृदयको एक लय छ
एक लय छ हाम्रो मस्तिष्कको
एक लय छ हाम्रो गतिको
हाम्रा आँसु हाँसो, सुख-दुःख
सबैसँग छ एक लय
यी सबैको योगबाट जन्मन्छ जीवनमा एक अनुपम लय
र त्यो सितारझैं बज्न सुरु गर्छ ।

तर ओ समय !
म भने जीवित छु यतिबेला
लय भङ्ग भएको भूगोलमा ।

०००
दाङ
डा. गिरीकाे हालै प्रकाशित ‘रातमा कलम’ कवितासङ्ग्रहबाट ।