नेपाली हास्यव्यङ्ग्य अनलाइन पत्रिका

डा. अमर गिरी :

फाँसीको डोरीझै झुन्डिएको छ तुइन नदीमाथि
केही बेरपछि
यही तुइनमा झुन्डिएर पुग्नु छ नदीपारि ।

कहिलेदेखि झुन्डियो यो आदिम उपकरण नदीमाथि,
थाहा छैन
मैले थाहा पाउँदा
नदीमाथि तुइन थियो
तुइनमा म थिएँ ।

थाहा छैन केही समयपछि म नदी पारि हुनेछु
वा उसको अतल गहिराइमा
हरेक पटक झुन्डिदा तुइनमा
आधा मरिसकेको हुन्छु म
नदीको गहिराइबाट आइरहेझै लाग्छ
असमयमै मरेका मानिसहरूको आवाज
र बेसरी निसासिन्छु नदीको बिचमा ।

फाँसीको डोरी र नदीको बिचमा झुन्डिएको तुइन
र मेरा शासकको अनुहार उस्तै उस्तै लाग्छन् मलाई ।

०००
रातमा कलम (२०८२)