नेपाली हास्यव्यङ्ग्य अनलाइन पत्रिका

खगेन्द्र नेउपाने :

बेइमान रहेछ उस्ले पनि दिमाग चाटेर गयाे
पानी लिएर आउँछु भन्थ्याे बादल ढाँटेर गयाे ।

अस्तिदेखि उस्का झाेलेहरु कराउँदै थिए
पक्का याे साल त धेरै पानी छ
सेताे बादल देखाएर भन्दै थिए
अझै उस्मा खुब जवानी छ
तर घामकाे ताताे बर्षाउँदै
बेकाम दिनहरु गुज्रिरहेछ
माैसमका आश्वासनहरु अब
नपत्याउनु पर्ने भएछ
आउँदै जस्ताे लागेकाे तर उतै डाँडा काटेर गयाे
पानी लिएर आउँछु भन्थ्याे बादल ढाँटेर गयाे ।

पानी परेपछि माैसम शितल हुन्छ भन्ने आशमा
भिजेकाे माटाेकाे मिठाे बासना
उम्रिरहेका मुनाका सुवाससंग मिसिई
आनन्दी रात बिताउँला भन्ने सपनाहरु
सबै चकनाचुर भएछ
यीनीहरुकाे आश्वासन पनि झुर भएछ
धैर्य गर भन्दै सस्ताे बाचा कसम साटेर गयाे
पानी लिएर आउँछु भन्थ्याे बादल ढाँटेर गयाे ।

कहिलेकाही खुलेकाे आकाशमा
थर्थराउँदा सेता बादलहरु
बतासकाे पर्खाई बाेकेर टहलिरहेछन्
आगाे बर्षाउँदै कुद्छ घाम
कलिला धानका गुभामा लुकेका गवाराका सन्तानहरु
संसार फेर्छाैं भन्दैछन्

उदाङ्गाे आकाशलाई जिस्क्याउँदै
ङिच्च हाँसिरहेछन् बगरहरु
सबैलाई जिल्याउँदै खरानीकाे डाेरी बाटेर गयाे
पानी लिएर आउँछु भन्थ्याे बादल ढाँटेर गयाे ।

०००
गाैरादह, झापा